uMthunywa
Wangithembisa lami: I N Mpofu
Ophezulu Stinta
SIYAQHUBEKA logwalo lwethu lapho esifunde khona ngokuqhutshwa kwesiko lokuvela, kanye lokulotsholwa kwentombi.
Singena kusahluko sesibili, lapho esihlangana lamalungiselelo omtshado esesezingeni eliphezulu. Ngosuku lomtshado umkhathi uvuka ujikisile ngendlela eyayingakhangelelwanga, abantu bayabe befisa ukuthi kuvuke kubetha umoya omnandi, umkhathi ungothobekileyo, uvumela abantu ukuthi bazithokozele, bezidlela umtshado kungela kukhathazeka abantu sebegodola kumbe sebecatsha phezu kwezihlahla, becatshela izulu.
Umoya wavela waqala ukuvunguza emathathakusa, uNyembezi laye wawuzwa umoya lo uvunguza phandle laye wazizwa nje ephelelwa yinjabulo, kodwa-ke akukho ayengakwenza, loba wayelesifiso esithile ngosuku lwabo lomtshado.
Izolo-ke abadala bebekhangela kakhulu ngenkolo, okokuthi lapho umkhathi uvuka uyilolo hlobo babesiba lensolo thize ukuthi pho umtshado lo wawuzaqhubeka kuhle na, wawuzaphutsha ngokuhle yini.
Ngesiko lokuhlalisana kwezakhamizi, ilanga lathi lisithi catsha nje izakhamizi zasezi didizela emzini wakoNyembezi besenza wonke amalungiselelo omtshado.
Lapho sisehlukanisa umtshado wayizolo lalamuhla kulezi nsuku sibona sekuqatshwa abantu abazocecisa umtshado kanye labapheki. Izolo konke lokhu bekusenziwa yizakhamizi. Bekuyindlela yokuqinisa ubuhlobo kanye lobudlelwano esigabeni, ukuncedisana kulungiselwa imicimbi efana lale.
