uMthunywa
Imibhalo engalotshwanga: Izingoma
Ophezulu Stinta
Siqhubeka ngemihlobo yethu yezingoma ezitshiyeneyo, ilifa elimumethe ulimi oluhlabusayo, ulimi olukwazi ukuthoba inhliziyo ezidabukileyo, ulimi oluqinisa amadolo anzima, ulimi njalo oluphakamisa amadolo asindayo, ulimi olukwazi ukufikisa umlayezelo unjalo kundawo ezifaneleyo, yilokhu okuqukethwe yimihlobo yezingoma etshiyeneyo.
Kesikhangele umhlobo wengoma zengquzu, lo ngumdlalo wamajaha kanye labafana, kuyabe sengathi bazwana amandla njengoba bedlala ngokutshayanisa izinyawo, okungalimaza inqagala kuqakathekiswa umdumo lo ozwakala lapho kutshayaniswa izinyawo lezi.
Mhlawumbe okuyikho njalo okwenza ingoma yakhona iqondane labesilisa, itshiye abesintwana ngaphandle, kanti bengangqikilana ngayiphi ndlela, ngoba kulula nje lokulimala kodwa kufuneka abesilisa abalolwazi lokuqhuba umdlalo lo.
Ngesikhathi kuhlatshelwa ingoma zengquzu, abesintwana abenqatshelwa muntu ukuthi babukele labo bengazihlabelela ingoma thize, okwakuyindlela yokuzibonakalisa emajaheni.
Esikunanzelela kakhulu yikuthi imidlalo le kanye lengoma lezi zazi lezinga labantu ababephatheka kizo yikho nje kwande elithi kulapho izintombi ezazibona khona amajaha, kumbe izinsizwa lazo zibone izintombi, kwakukhululekile kulabo abasezingeni lokwenda kanye lokuthatha. Izolo imfundo ibingavamanga kakhulu, obekuqakathekile, yikwakha umuzi, kukhuliswe isizwe, umnotho ukhangelelwe esibayeni kanye lasemasimini.
Umdlalo wengquzu lo kwakungumdlalo omkhulu okwamagama, ngoba ijaha elalisazi ingquzu yilo njalo elaliyinkonjwa insizwa yezintombi ngalezo nsuku.
Sinanzelela ukuthi konke lokhu kwakuyindlela yokuzilibazisa, izolo bezingekho ibhayisikopo ezifana lesikubukela kulezi nsuku, abantu abathatha isikhathi sabo besiyakubukela, ngendlela yokuchitha isizungu.
