uMthunywa
Imibhalo engalotshwanga
Ophezulu Stinta
Siqhubeka ngokukhangela izaga zesiNtu kabanzi. Silandela imihlobo yezaga etshiyeneyo. Sikhangele izaga ezithathelwa ezintweni ezimilayo. Sixoxe kafitshane ngesaga esithi:
Umthwentwe uhlaba usamila. Umthwentwe butshani obukhula emaxhaphozini, buyanaba bugcwale indawo yonke, utshani lobu bunaba bule nsungulwana ezihlabayo, buhle buhlabe busamila utshani lobu. Yikho nje lapho okuvelela khona isaga lesi, abendulo babuhlolisisa babubona indlela obukhula ngayo, babuqathanisa lokukhula komntwana.
Umqokolo wendwangu uvuthelwa emlonyeni: lesi yisaga esavela lapho abantu benanzelela ukuthi indwangu izidlela umqokolo oluhlaza okusobala ukuthi owayo uzavuthelwa esiswini. Indwangu layo iyabe ingelasiqiniseko ukuthi umqokolo lo ingawutshiya kusasa izabe izawuthola yini ngakho kubelula nje ukuthi ihle izidlele umqokolo wayo ungavuthwanga unjalo.
Ngokufanayo isaga singasetshenziswa lase ntombini ukuthi oyikhombisileyo kahle ayithathe abanye bangakaze bayithathe. Ngokubuka izehlakalo ezithile zemvelo abadala babesenelisa ukuxhumanisa lempilo yabo.
Inhiwane elibomvu ligcwala izibungu.
Ekudleni kwabo izithelo zeganga abadala bananzelela ukuthi ikhiwane elaligijinyelwa yibo bonke, likhanga emehlweni lalitholakala lilezibungu. Yisaga esiyixwayiso kakhulu empilweni ikakhulu ezintombini, ukuthi leyo ekhanga emehlweni izikhathi ezinengi yileyo engelasimilo. Ngakho yisixwayiso esikhulu kakhulu lasemajaheni ukuthi aqaphele ekukhetheni intombi lapha angaze akhangwa yikukhangeleka kodwa baqaphelise isimilo.
