uMthunywa
Ugwalo – Ugqozi Lwezimbongi
Ziqoqwe zahlelwa nguP Mpofu
Ugwalo ludindwe yiMambo Press ibambene leThe Literature Bureau
Imbongi nguS N Thebe
Isihloko senkondlo – Ukufa
Ngilethemba liyakunanzelela bafundi ukuthi zimbalwa inkondlo ezikhuluma ngokufa kule ingxenye yesilabhasi eliyifundayo. Ezinye zakhona kazilasihloko esihle sithi bhadla ukufa njengayonale ekaThebe. Njengoba sike satsho ngaphambili lana ishloko singathi ukufa mgceke kodwa nxa siyifunda siyezwa ukuthi into ekhulunywa lapho inye, “ukufa”. Liziqaphelisise-ke nxa lizifunda lezi nkondlo ukuze lingaxubanisi ezikumumetheyo.
Kuyenzeka ukuthi uthi okuthile kuvela kunkondlo kaThebe kanti hatshi usucuphe kweyomunye njengoba zikhuluma ngantonye kodwa amzwi asetshenzisiwe etshiyene. Kuyenzeka futhi ukuthi abahloli bathi lizifananise kumbe liziqathanise lezo nkondlo. Kubalobunzima-ke nxa umfundi engazifundanga waiqedisisa wezwa ukuthi zikhuluma ngani loba njani. Hlakanipha-ke mfundi uthi nxa uzifundi lezinkondlo ube ngokhaliphileyo.
Esikuqaphela kule inkondlo yikuthi ukufa yinto ebuhlungu eqeda yonke intokozo kumbe ubunandi. Imbongi iqala inkondlo yayo ngesililo kumbe ngithi ukukhala okukhulu kulilelwa osefile, osedlule kulumhlaba kumbe ngithi osebhubhile. “Saqhum’isililo sikaNandi”. UNandi wayengunina weqhawe lakwaZulu, uTshaka owatho mhla efile kwabalokukhala okukhulu kwesizwekazi sakwaZulu. Sezwakala kude leso sililo yikho kwakuthiwe isililo sikaNandi nxa kulokulila okukhulu ekufeni komuntu othile.
Sekufiwe lapha kwabalokukhala okukhulu, kwaqaqamba isimame okutsho ukuthi kwakhala omama. Esintwini kwaziwa omama kuyibo abakhala kakhulu emfeni kanti obaba kuthiwa ezabo inyembezi ziphelela esiswini abezwakala behlaba umkhosi. Kwaphela bonke ubunandi sekufiwe lapha. Omama beqaqamba bekhal kakhulu obaba njengemvelo bakhangela phansi emhlabathini, bawathelezela ngezinyembezi. “Kwaqaqamb’isimame/Obaba bahlanyel’ameh’ab’emhlabathini,/Bawathelezela ngezinyembezi”.
Iqhubeka imbongi ichathekela uZulu lpkho uMdali akutshela abantu: “Wadalwa ngodaka;/Odaken’uzobuyela.” La ngamazwi avela encwadini engcwele iBhayibhili, abantu bekhunjuzwa ukuthi benziwa ngodaka njalo odakeni bazobuyela. Ngamanye amazwi kutsho ukuthi abantu kabangethuki ngoba lokho kwamiswa nguMdali ngoba odalayo lodilizayo munye. UMdali wenza lokho akuthandayo ngebumba lakhe.
Ngenxa yalokhu-ke siyatshelwa ukuthi ukudiliza lokwakha yintando yakhe uMdali. Siyakhunjuzwa njalo ukuthi seza kulumhlaba sinqunu singembethe luthi ngendlela efananayo sizonuyela sinqunu lapho esavela khona. Sitshelwa amaqiniso njalo kule inkondlo ukuthi insuku zethu zibaliwe lapha emhlabeni. Ikusasa likude. Isethuse njalo imbongi ukuthi alikakhali iqhude mhla likhalayo imigoqo yokunxib’esangweni lokufa kasiyikuyithola.
Mhla elokufa selifikile akula owelisa ukulimisa ngoba liyintando kaMdali.
