Ukuhlaziya inkondlo

20 Aug, 2020 - 00:08 0 Views
Ukuhlaziya inkondlo

uMthunywa

Ugwalo – Ugqozi Lwezimbongi
Ziqoqwe zahlelwa nguP Mpofu
Imbongi nguS N Thebe
Isihloko senkondlo – Ukwenda
akutshayelwa amathambo

Isihloko sale inkondlo siyisaga. Izaga zaziqakathekile kakhulu empilweni kaMthwakazi endulo ngoba zazifundisa. Zazikhulunywa ngoba kulesiga esithile esenzakeleyo kumbe njalo kukhuzwa kumbe kuhlekwa umuntu owenze okuthile. Lapha sihlangana lomama ophakathi kobuhlungu ngohlupho asehlangane lalo emendweni.

Bayenda abantu bethi bazahlala kahle ekwendeni kanti bengabuzanga elangeni. Umama lo usehlangane lembila zithutha umyeni wakhe usemthwalise nzima yikho esekhala umama lo ethi: “Ukwenda akutshayelwa amathambo.” Inkulumo le iyakhuluma isiyaphambili umama eyitsho engezelele ngokuthi aluba wayesazi ukuthi ekwendeni kwakhe wayezahlupheka kanje wayezaqala ayetshaya amathambo azi ukuthi indlela yakhe injani engakendi.

Ngeviki ephelileyo sitshengise umama okhalayo ekwendeni kodwa yena uhlutshwa yisithembo. Intandokazi isifike yamhluthunela umyeni wakhe. Lo akulanyanewabo ofikileyo ukuzamphambanisa kodwa indoda yakhe isithanda utshwala ukudlula yena. Ithi ingabunatha indoda yakhe ifike imdiklize aze akufananise lokukababhemi. Kakuqedisisi ukuthi kubangelwa yini lokhu umama lo lokhu lesono asenzileyo kumyeni wakhe kasiboni.

Uyambuza umyeni wakhe ukuthi woneni njalo lanxa onile kona bani okungela xolo? “Sithandwa ngoneni bantu?/Kona ban’okungelaxolo na?

Kade sasithandana kukuhle/Lamuhla sekuthen’usungibulala bo?” Uyamangala umama lo ukuthi umoneleni umyeni wakhe khona okungaxolelwayo. Ubuyela emuva amkhuze owakhe ukuthi kade bethandana kukuhle kodwa lamuhla sekutheni esengombulalayo?

Yonke into ihamba kuhle lapha ekhaya – izingane zabo zandile, ezinye zendile, lenotho yabo yandile, usebuze-ke umama lo ukuthi katshiye konke lokhu okuhle? Abe ngulowo osebenzele ize kugcwaliswa yisaga esithi: “Kube ngezenj’izithukuthuku”. Isaga esipheleleyo sithi izithukuthuku zenja ziphelela emoyeni kusitsho khona ukuthi umuntu usebenzele ize. Kunjalo ngenja egijima ize iphose yephuke ixotsha inyamazana kodwa ingayibamba ihola inhlamba u(futseki), lenyama ezinhle kayiziphiwa iphiwa amathambo kuphela.

Umama lo laye ubona ukuthi angatshiya yonke inotho le uyabesebenzele ize. Usezifanisa lesikhukhukazi sona esithi sifukamela amaqanda sibe sesidliwa yibutata okuyizinanakazana okuncane okungakhanyiyo kodwa bukuhamba njalo kuluma. Uma lo ukuthi ngenxa yalokho akunani ngoba sikhonapho sifukamela amaqanda isikhukhukazi lephimbo inyoka ingasigeca kungabindabazalutho.

Sekusobala kulumama ukuthi njengoba engasathandwa nje useyahamba aduhe lelizwe engazi lapha ayakhona, enyanyeke ebantwini lokhu kufakazwa ngamazwi athi: “Ngibe yisifinyo esicicim’ingcekeza.” Into ecicima ingcekeza iyenyanyeka kayikhangeleki. Sekunjalo osowabo bamhleke. “Baphubuke begegtheke’osowethu/Senginquma lezinkomponi.” Uyatshaywa ngumyeni wakhe lumama aze ambuze athi:

“Hawu baba wangidikliza kangaka /kwangani ngingubabhemi/Njal’esam’sono kangisiboni./Ngob’usuth’amabele: /Ngoba won’ekwehlula:/Angitheleli indunduma lemvimvinya.” Lapha sizwa imbangela yokuhlukuluzwa kwalumama. Kungenxa yokuthi umyeni wayo usedakwa, wehlulwa ngamabele.

Ngenxa yalokhu usetshaywa aze abe lemvimvinya. Seziguqukile izinto ngoba zazinhle lezo nsuku behamba bonke ingalo lengalo, umoya lomoya.

Asikhumbuleni ukuvikekeni umkhuhlane lo oyingozi ubhubhane kweCOVID 19. Hlala uhlanzekile ulandele izixwayiso zabezempilakahle.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds