uMthunywa
Ugwalo — Ugqozi Lwezimbongi
Ziqoqwe zahlelwa nguP Mpofu
Ugwalo ludindwe yiMambo Press ibambene leThe Literature Bureau
Imbongi nguJ J Mpofu
Isihloko senkondlo — Silind’iKhisimusi
IKHISIMUSI yilanga elithakazelwa ngamakholwa amanengi wona akholwa ukuthi yilo ilanga okwazalwa ngalo umntakaNkulunkulu uJesu Kristu. Ngaleli langa elingu 25 KuMpalakazi abantu bayajabula kakhulu ngendlela ezinengi. Lamhlanje sihlangana lembongi le ekhethekileyo isitshela ngalokho okwenzakala ngelanga elandulela yona iKhisimusi. Imbongi ngamanye amazwi ithi balinde lona ilanga leKhisimusi.
Imbongi iqala inkondlo yayo ngokusilandisela ngomumo wemvelo ngalesi sikhathi. Njengoba kuzajatshulwa kangaka ngosuku oluqakatheke kangaka imvelo layo ikhanya ihambelana njalo ivumelana lalesi sikhathi. Imbongi ibuka iganga ikhangwa yizihlahla eziluhlaza. Sinanzelela ukuthi lokhu kwenzakala nxa izulu line kuhle ngesikhathi sehlobo. Lisana kuhle izulu bekuthi nxa kufika isikhathi seKhisimusi imvelo isivathile kukuhle kuluhlaza tshoko nxa ukhangela imvelo.
Ngalesi sikhathi kuphazima ikhaba kutshengisa lomcebo woNsundu, inkomo phela zimofuza utshani zisuthi zicamula. Kambe ziswelani utshani buluhlaza lamanzi ekhona. Uqunga utshani lobuya obusetshenziswa ukufulela izindlu labo buyakhula kuthi loqethu lolu olulukhula olungafunwa ngabantu emasimini lalo lunaba kuhle ngoba umkhathi uvuma ukuthi lukhule. Sinanzelela ukuthi imbongi yenze uqunga loqethu samuntu ekhuluma ngakho angathi uqamba amabizo abantu.
Ye, kuluhlaza kunje imbongi ithi nxa amakha leminuko lundenda emoyeni ayagcwala kuye ezwe eseneleseka. Imnandi imvelo kumbongi ize ithe nxa imbongi icicizela ngalolohlobo izwa ukudidizela ekhanda. Nxa ikhangela emasimini ibona intanga enabileyo kodwa okuyothi ngemvelo yayo itshe kusale ijodo. Lotshani lobu okuthiwa lusezi lalo ngolokufulela futhi luza ludlule ngezimiso zemvelo. Izinto emhlabeni ziza ngezimiso zemvelo.
Nxa imvelo inhle kangaka imbongi ithi yekumuntu olinde iKhisimusi ilanga lenjabulo, abanye ngabasuka emizini yabo bevakatshela kwezinye indawo. Ngolwenzenjalo abanye badele imihlambi yabo. Kunjalo kulindwe iKhisimusi kwabanye yizililo. Kulezifuyo ezithile ezilahlekelwa yimpilo yazo. Imbongi ikuveza ngala amazwi:
“Khal’uvalelise qhude likadade/ Wo Jamuludi kababa lakutshonel’emini./ Bona hlaza lobo obumfumfutha/ Ubutshwaya ngenda, ngengaka imithamo,/ Lothi lisa bogqekezwa nguyw’ekakhulu.” Ngosuku kulindwe iKhisimusi kubulawa izifuyo ezinengi, onkukhu, imbuzi kanye lenkomo ezimelwe nguJamuludi lapha. Sekungathi iyazihleka izifuyo zakwabo imbongi ngoba ittshla uJamuluthi ukuthi sebeyibulele ngelanga leKhisimusi bazoyidlithiza bankantshe iminkantsho bethabele iKhisimusi.
Ngelanga leKhisimusi bakhona abazibuka ngezigqoko ezintsha kugwatshiselwana langezipendamlomo eziyabe zifakiwe. Abanye labo ngaleli langa bagwaba ngabo salaze. Ogogo labo ngaleli langa babhemisana ngohwithwayo itiye phela lokhu phela bayamthanda uhwithwayo ogogo.
