Ukuhlaziya inkondlo

28 Feb, 2019 - 00:02 0 Views

uMthunywa

P Mpofu

Imbongi ngu N S Sigogo
Isihloko senkondlo — Uthi Sithini Kuwe?

INKONDLO le imayelana lokufa khona osekuqede kumbe okuqeda abantu emhlabeni. Ekuqaleni imbongi isebenzisa isingathekiso ukuchaza ukufa lokhu ikubiza ngokuthi: Sil’esimaphikophiko.

Lesi-ke yisilo esilempiko okwenza lokhu kufa kundize kugcwale umhlaba wonke ngesikhathi esifitshane.

Ukufa kufika ebantwini loba nini kunganxuswanga. Kuyafika loba ngasiphi isikhathi ukufa ebantwini kungadingi kunxuswa.

Kubi ukufa lokhu ngoba imbongi iveza ukuthi kubemuka izingane zabo kanye lezifuyo zabo.

Ngalokho imbongi iyakubuza ukufa ukuthi pho bathini kukho.

“Uthi sithini kuwe?” Sekwabulala kwathatha amaxhegu akibo kwembongi, Kwaya phambili kwatshiyisa ogogo indondolo zabo. Siyakwazi ukuthi abantu nxa sebekhulile bayasebenzisa indondolo.

Konke labokhulu bayazisebenzisa indondolo hatshi ogogo bodwa. Ngalokho ukufa kutshiyisa ogogo labokhulu indondolo.

Akula oya ekufeni ngokuthanda. Imbongi ithi ukufa kubabamba ngamandla besala ogogo labokhulu. Kuthiwa ukufa kwabahudula laba asebafayo kwehla labo kubasa koZwi.

KoZwi kuselizweni labafileyo lapho abangasakhulumi khona ngoba sebethule okwempela lamampela. Ngokunjalo iyabuza imbongi ukuthi sithini kukho.

“Üthi sithini kuwe?”

Lamhlanje ngenxa yokufelwa lokho abantu sebezintandane. Sekungathi bamila phansi ngoba bengasela bazili.

Ukuba zintandane lokhu kubangelwa yikho Kufa lokhu. Izondile imbongi, izondela khona kufa lokhu ngoba ithi kusa kwamalanga kucola abathakathi.

Lokhu kungabe kusitsho ukuthi ukufa kusebenzelana labathakathi ekubulaleni abantu.

Kubi lokho okwenziwa yiKufa ngoba kuthathela imbongi ogogo labokhulu abantu abalibazisa izizukulwane ngokuzethela inganekwane.

Njengoba ukufa sekubathethe ogogo labokhulu abayibo abetha lezonganekwane imbongi isikubuza lokhu kufa ukuthi bazozethelwa ngubani-ke imbongi zolimi lwakibo.

Sikunanzelele ukuthi ogogo labokhulu nxa besetha inganekwane bafundisa izizukulwane zabo ulimi lwakwazo oluqondileyo njalo olujiyileyo.

Isibuza imbongi kukho ukufa ukuthi zingaphi izihlobo kanye lezitha zabo? Iyaqhubeka imbongi ithi bangaphi ogogo labokhulu babo.

Zinengi izihlobo zembongi esezidliwe yikufa ngoba ibiza ukuthi bangaphi oyise labonina, banengi abanewabo labodadewabo.

Itsho futhi imbongi ukuthi, “Baphi bonke lababantu?” Imbongi iyafakaza ukuthi bona njengabantu sebehlala bedanile ngenxa yokufa osekusenza angathi umhlaba kasiwabo kanti uNkulunkulu wabapha umhlaba ethi: “Zalanani lande.”

Ukufa khona kukhanya kuphikisana laye uNkulunkulu njalo kakwesabi lobukhulu bakhe.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds