uMthunywa
YiNtatheli kaMthunywa
UHLELO lokuhlatshwa kwabantu bakuleli amajekiseni okuvikela umkhuhlane weCovid 19 lusungulwa kusasa (ngoLwesine) njalo kuqala ngezisebenzi zogatsha lwezempilakahle kulandela ukufika ngoMvulo kwemithi engu- 200 000 eyanikezwa ilizwe yiChina.
Ilizwe leChina lizaletha njalo eminye imithi engu 600 000 eyathengwa nguHulumende wakuleli kunyanga ezayo.
NgoMvulo, uMongameli Mnangagwa uthe eminye njalo imithi evela kwamanye amazwe agoqela iRussia, India kanye le-United Kingdom layo isendleleni.
Inkampani yeChina elungisa amajekiseni iSinopharm, ithi umuthi wayo ulamandla okusebenza okuyisilinganiso esingange 80% ekuvikeleni iCovid 19. Inhlolisiso yakuqala itshengisa ukuba ijekiseni yeChina iphephile.
UHulumende ubike ukuba akulamuntu ozabanjwa ngamandla ukuthi ahlatshwe lijekiseni.
USenetha Monica Mutsvangwa onguMphathintambo wogatsha olubona ngokuhanjiswa kwemibiko esethula okukhulunywe kuKhabhinethi ngoLwesibili uthe bonke abazahlatshwa ijekiseni le bazabhaliswa besebebikelwa ukuthi bazohlatshwa njalo nini ijekiseni yesibili. Uthe bonke abazahlatshwa ijekiseni yakuqala bazathola eyesibili.
Uthe abahlatshiweyo bazakhangelisiswa ukuze kubonakale nxa kulokungakhangelelwanga osokusenzakala emizimbeni yabo ngenxa yokuhlatshwa lijekiseni.”
Uhlelo lokuhlaba amajekiseni la, luqala ngoLwesine mhlaka 18 Nhlolanja 2021 njalo akula ozabhadalela ukuhlatshwa. Injongo yehlandla lakuqala yikuhlaba isilinganiso esingange 22 phesenti somphakathi, kuhlandla lesibili kuzahlatshwa i- 18,4 phesenti; kuhlandla lesithathu kuzahlatshwa njalo enye i-18,4 phesenti okutsho ukuthi siyabe sesihlabe inani elingange 60 phesenti yomuntu wonke oselizweni.”
“Ikhabhinethi ithanda njalo ukubikela uzulu ukuthi ngaphansi kohlelo lolu kuzaqala ukuhlatshwa abasebenza kwezempilakahle, kulandele amapholisa, amasotsha kanye labogadijeli. AbeZimbabwe Revenue Authority of Zimbabwe, Immigration kanye labe Agritex labo bazangena kuhlandla lakuqala. Abantu abaleminyaka yokuzalwa engu- 60 kusiya phezulu kanye lamanye amaqula azafakwa lawo kuhlandla lakuqala.”
Uthe ihlandla lesibili lizagoqela ababalisi bamakolitshi lamayunivesithi kanye lababalisi bezikolo, kukanti abanye bonke abaseleyo bazangena kuhlandla lesithathu.
UDokotela Agnes Mahomva onguChief Coordinator National Response uthe uhlelo lolu soluvuthelwe ukuqala.
“Uhlelo soluqalile kasibuyeli emuva. Sisebenza ngesiqubu.”
