uMthunywa
Khanyile Ndebele
UMCULI osakhulayo wakoBulawayo uGlynnis Maggie Manuel upheke ingoma yakhe yokuqala ekhumbuza abasifazane ngokubaluleka kwabo loba bephuma phakathi kobudlelwano obungaphumelelanga.
UMaggie oleminyaka engu-25 yokuzalwa ukhuphe ingoma yakhe yakuqala eyothando elesihloko esithi-Better mhlaka 16 Mabasa.
Ingoma le ikhuthaza abesifazane ukuthi bazi ukuba baqakathekile loba beke baba kubudlelwano obungaphumelelanga.
Uthe okwamenza wabhala ingoma le yikuthi laye uke waba phakathi kobudlelwano obungenzanga kuhle njalo uyazi ukuba abanengi babacine belahlekelwa lithemba.
“Ingoma le ayiqondanga muntu othile kodwa iya kuye wonke umuntu oseke wadlula kulokhu. Okwangikhuthaza ukuthi ngilobe ingoma le yikudlula kubudlelwano obunengi obungaphumelelanga ngihlose ukuba nginike labo abaphakathi kobunzima ithemba lokuba baqine,” nguMaggie lowo.
Ebuzwa ukuba uqale nini ezomculo uveze ukuba ukuhlabelela wakuthakazelela esakhula njalo kwesinye isikhathi wayethola ithuba lokuhola ingoma yelizwe i-national anthem ngoba ukuhlabela ekuthanda.
“Ngaqala ukuthanda ukuhlabelela ngisemncane kakhulu ngisafunda ibanga langaphansi njalo ngangihola ingoma yelizwe ngoba ngangisaziwa ukuthi ngiyakuthanda ukuhlabela ngaze ngacina nginqume ukuthi ngifuna kube yiwo umsebenzi wami,” kutsho uManuel.
Uphinde njalo wabonga uphurojusa wengoma ethi Dee Mason oweJets studio eHarare kunye labeWonders Visuals yakoBulawayo ngokupheka ividiyo yakhe okwenze isifiso sakhe safezeka.
Uphethe ngokutshiyela abathakazelela ezomculo inselela yokuba bangalahli ithemba.
“Kulabo abathanda ezokuhlabela ngithi nxa ufuna ulutho, kalube semoyeni wakho, engqondweni kunye lasemzimbeni wakho uphinde usebenze nzima konke kuzafezeka ngesikhathi,” kuphetha uMaggie.
