uMthunywa
Thokozile Mbedzi
ZILOKHE zikhuza imihlolo izakhamizi zeDzikamunhenga eGokwe ngemva kokuba kuvele ukuthi kulendoda esileminyaka emihlanu ihlangana lendodakazi yayo emacansini osokubangele ukuthi izithwale.
Indoda le (ibizo siligodlile) kubikwa yaqala ukuhlangana lendodakazi yayo ileminyaka engu-15 yokuzalwa njalo lokhu kuqhubeke okweminyaka emihlanu unina engazi lutho.
Ekhuluma lentatheli kaMthunywa uMnumzana Kufazvineyi obesedale lenduna uChireya uveze ukuthi kala nkani ngokwenziwe yindoda le eyakhipha indodakazi ubuntombi yaze yamkhulelisa.
“Sididekile imicabango ngesenzo sikababa lo sokuya emacansini lomntanakhe aze akhulelwe. Uzikhulumele ngowakhe umlomo umntwana ukuba uyise useleminyaka emihlanu esiya emacansini laye.
“Uveze lokhu ngesikhathi ebuzwa edale ukuba lapho okwaqala khona yena waphaphama uyise ephakathi kwengubo zakhe. Uthe uyise wamtshela ukuba akwenzayo kulisiko lakibo akumelanga atshele muntu loba unina ngoba angahlanekelwa ngamadlozi.
“Uphinde waveza ukuthi uyise wayehlala esithi unina ayevakatshela izihlobo zakhe bethi sebesele bebabili asale emenza umfazi,” kulandisa Mnu Kufazvineyi.
Induna uChireya ibuzwa ngodaba lolu ivumule yathi unina womntwana ufike edale lakhe ezomangala ecabanga ukuthi indodakazi yakhe yonwe ngabafana besigaba kukanti hatshi nguyise.
“Ngihle ngathi kababuye bonke lomkakhe lakanye babuya. ,” kutsho induna uChireya.
Induna ithi njengenkundla banqume ukuthi udaba lolu bazaphinda baluhlalele phansi njalo luzadluliselwa emapholiseni. Ithe umsolwa esizwa lokhu uhle wadliwa ngumsweya njalo abantu bathi wabonakala eKwekwe,” kuphetha induna uChireya.
