UKHITSHWE kuqembu le-Cape Town ngesivuvu kwakhathazeka abalandeli bakhe uBenni McCarthy kodwa sebebobotheka nanko kuvela ukuthi usengabizwa yi-Orlando Pirates kumbe liqembu lesizwe iBafana Bafana.
Kusukela ngoNhlangula uMcCarthy ubebalelwa ukuba aqanse ayeqeqetsha isizwe lalapho kulabacubunguli benguqu ababika ukuba akakahlakaniphi kangako ukuphiwa lumsebenzi.
UMcCarthy unqobe inkezo yeMTN leCape Town City ngesizini edluleyo. Nguye umqeqetshi oleziqu zokuqeqetsha eziphezulu ukubadlula bonke nanko utshaya nge-Uefa Pro Licence. Kumaviki adluleyo uPitso Mosimane, opheka iMamelodi Sundowns, uphumele sobala ngokuthi ubona umqeqetshi wakusasa oweBafana kunguMcCarthy.
Owakuqala ukuchothoza inyathelo lokuqhatsha uMcCarthy kwakunguLucas Radebe.
URadebe uphindile futhi umbono wakhe wokululaza uMcCarthy wathi ubona kungcono ukuthi labo abacabanga ukuqhatsha uMcCarthy betshiye imicabango le.
URadebe wayengukaputeni weBafana adlale kuyo imidlalo engu-70. Ngomunye wabadlali abazakhela igama ku-English Premier League esayibamba ku-Leeds United.
Uphawule lokhu ngemva kwenkulumo ezisabalele ezokuthi iqembu lesizwe sekufanele libuyele esandleni somqeqetshi waseMzansi. Kukhona abaphakamisa ukuthi iSouth African Football Association (Safa) iqhatshe uMcCarthy.
“Ngokwami uBenni kunengi okusafanele akufunde. Lo ngumbono wami. Usendleleni enhle okwamanje. Izinga lakhe liyavela kancane kancane. Ngicabanga ukuthi angaba nguye umqeqetshi weBafana eminyakeni ezayo,” kutsho uRadebe.
IBafana, ebikade idlala umdlalo wokucina wokuhlungela i-Africa Cup of Nations (Afcon) leLibya izolo ebusuku, iqeqetshwa nguStuart Baxter. UBaxter uvele uhlezi ngesinqe esisodwa esikhundleni. Sekuvele kanengi ukuthi iSafa ifuna ukumchitha phezu kokuba elenkontileka ende. URadebe ngomunye wabadlali abahlonitshwayo kodwa abatshaywa ngesithende yiSafa phezu kokuba ihlala ithembisa ukuthi izozisondeza izinkakha. Ukuchithile ukuthi wanqaba iSafa imfaka kwesinye isikhundla.
“Angikaze nginqabe lutho oluvela kuSafa. Ngihlala ngisitsho ukuthi ngikulungele ukusiza noma yikuphi lapho ngingabanjiswa khona. Kodwa kudingeka sihlale phansi sikhulume ngakho. Akukho asebake bakubeka etafuleni futhi angikaze nginqabe lutho. Ngifuna kucace lokho. Abakaze bakhulume lami,” kutsho uRadebe.
UBaxter wasayina leSafa isivumelwano somsebenzi esiphela emuva kweNkezo yoMhlaba yango-2022 eQatar.
Usanda kuzibophezela ukuthi uma ehlulekile ukuya ku-Afcon uzatshiya umsebenzi. Wahluleka ukufaka iBafana kuNdebe yoMhlaba ebiseRussia nyakenye. — Ubulembu