uMthunywa
Listen Ndlovu
UMHLABELELI wakoBulawayo osakhulayo weRhumba, uBrighton Maphosa owaziwa ngokuthi King Phosa usepheke idlalade elitsha elithi Ngixakwe Ngabantu.”
Umhlabeleli lo, ozalwa eNkayi ungene kunkundla yezokuzithokozisa ngomnyaka ka2020, ukhiphe idlalade elitsha ekuqaleni kwayonale inyanga.
Idlalade lakhe elitsha leli elilengoma eziyisikhombisa, likhuluma ngempilo yabantu yansukuzonke.
“Ngicula umculo weRhumba yakithi abanengi abathi yiTshibilika loba iTshovatshova.
Ingoma zami ezinengi zikhuluma ngempilo yethu yansuku zonke.
“I-CD le ngiyikhiphe ekuqaleni kwenyanga njalo ilengoma eziyisikhombisa.
I-CD
Ngomnyaka ophelileyo ngikhiphe njalo enye i-CD elama-single track amathathu.
“Ingoma zami zikhuluma ngempilo yansuku zonke.
Le eyisiqokoqela ethi, ‘Ngixakwe ngabantu’ ikhuluma ngokubaluleka kwabantu esiphila labo lanxa sikhutshwa yibo labo bantu esiphila labo.
Ezinengi zakhona zikhuthaza abantu ukuba basebenze ngokuzimisela ekwakheleni abantwana ikusasa elihle, ziyalaya, ziduduza kanye lokuqinisa abantu.
Zikhona njalo ezothando,” kutsho uKing Phosa.
Umculi lo useke wacula ndawonye labaculi abaziwayo abagoqela oMthutha Express, Pressure Super Sounds, uMadewa kanye laBantwana Bensindiso YamaNazaretha.
