uMthunywa
UMGADLI womdlalo wenguqu uKudakwashe Mahachi useveze ukuba isizatho sokusuka kwakhe kuqembu leOrlando Pirates esiya ku-SuperSport United yikuthi udinga isikhathi sokudlala.
Umdlali lo uthe eseseku-Orlando Pirates wayesedinwe yikukhuhla ibhentshi ngakho ulethemba lokuthi usezaphiwa isikhathi sokuthi atshibilike kuqembu elitsha.
Esaqeqetsha ngaphansi kweZimnyama, uMahachi ubengaphiwa isikhathi sokuthi azibonakalise enkundleni, okuyikhona okumcasule kakhulu ngoba ebona ukuthi uzidlalisela isikhathi.
UMahachi ungene emabhukwini eSuperSport United ngokuqala kwesizini le esuka kuBhakabhaka eloThamsanqa Gabuza.
Kuliviki uMahachi uphakulele iphephandaba likazulu eseGoli ukuba into ayidinga ngaphandle kokuthi adlale kuqembu eliqeqetshwa nguKaitano Tembo laye ophuma eZimbabwe yikuphiwa ithuba lokungena enkundleni.
“Kimi okuqakathekileyo yikudlala ibhola, ukuphiwa ithuba lokungena enkundleni. Ngakho ukusuka kwami ngisiya ku-SuperSport United ngikwenze ngoba ngilentshukuntshu yokudlala,” kutsho uMahachi.
“Bathe bengitshela ukuthi iSuperSport iyangifuna ngihle ngakuthathela phezulu lokhu. Ku-Pirates, njengoba kusaziwa, kugcwele umncintiswano wethalenta. Mina ngifuna ukudlala yikho ngithethe lelo nyathelo.” — Ubulembu
