uMthunywa
Musa Janga
KULOMFANA oleminyaka engu-13 yokuzalwa osekhethe ukugijimisa inyoni ezimbili ngasikhathi sinye nanko phela usesikolo njalo usekhiphe idlalade lakhe lakuqala elibizwa ngokuthi Intwana Flow. Lumculi obizwa ngelokuthi Tebogo Moyo kodwa esaziwa kakhulu kwezomculo ngokuthi “Tebza” uhlabela iHip Hop njalo idlalade lakhe elitsha lilengoma eziyisikhombisa.
UTebza uthi yena ukubona kumqoka ukuthi angene kwezomculo esesemncane ukuze abelobungcitshi esekhulile.
Okuhle yikuthi iloba ekhethe ukwenza ezomculo isikolo laso usibeka phambili
Ekhuluma lentatheli kaMthunywa ulokubona inengi labontanga bakhe belokuthi nxa bephuma esikolo benze into ezingalunganga ngokuthatha izidakamizwa kodwa yena wabona kungcono ukuthi ngalesikhathi abesenza okunye okungamphumelelisa empilweni yikho wafezisa isiphiwo sakhe sokucula.
“Abanye bethu nxa singatshayisa esikolo ubathola bethatha izidakwamizwa ngakho ngakubona ukuthi ngimncane kakhulu ukuthatha izidakamizwa ngakubona kungcono ukuthi ngifeze amaphupho ami okucula” kuchaza uTebza
uQhubekele phambili esithi uthanda ukubonga abazali bakhe ngoba abasazange bamncindezela lapho ekhetha lolu hambo. Uthi bamsekele kakhulu loba umnewabo l owaziwayo ngezomculo uMduduzi (Mdu-man) yena waqala angathi kakuzwisisi lokhu.
“Abazali bami bayangeseka kakhulu, umama lomalume balokubuya bezongibukela lapho engihlabela khona njalo bahlala bengikhumbuza ukuthi imfundo kuqala okunye kulandela emuva. Umnewethu laye wacina ekwamukela lokhu saze sahlabela sonke enye ingoma ephakathi kwalaleli dlalade”, kutsho UTebza
UTebza uzabonakala njalo esenza adume ngakho uTebza labaculi bodumo be Hip-Hop uCal_Vin loMzoe 7 kuma Zim Hip Hop Awards azenziwa lonyaka.
Kudlalade lakhe njalo kulengoma lapho ahlabela khona mayelana lengculazi.
Uthi okwenze wahlabela ingoma le yikuthi esikolo bahlala befundiswa mihla yonke mayelana ngalingculazi ngakho wasekubona kungcono ukuthi kumculo wakhe ahlabele ngayo.
“Esikolo sitshona sifundiswa ngomkhuhlane wengculazi ngakho ngakubona kungcono ukuthi ngike ngihlabele ngayo”, kuphetha UTebogo.
