uMthunywa
Wayne Ncube
UMDWEBI wakoBulawayo odweba ngomfutho usetshengisele ubuciko bakhe kuzulu nanko phela ubukise umsebenzi wakhe ogxile endaweni zokwethekela zeZimbabwe eCowdray Park ngeviki ephelileyo. U-Brendon Mubembi ozibiza ngokuthi Tylor doart ZW uqale ukubukisa imifanekiso yakhe ayidwebayo elokitshini leCowdray Park Terminus ngoLwesihlanu lweviki ephelileyo njalo ukhangelele ukuthi athathe umbukiso wakhe awuse endaweni ezitshiyeneyo. Intatheli kaMthunywa ikhulumisane loMubembi waveza ukuthi ukudweba yinto esenhliziyweni yakhe njalo okumkhuthazayo yindaba yokuthi ufisa ukuba umsebenzi wakhe ubukiswe abantu abanengi benelise ukuwubona kumaArt Gallery.
Uthe ngokudweba indawo ezehlukeneyo zokwethekelela ufuna abantu babelethuba lokubona indawo abazithandayo ngakho uthemba ukudweba kuzafinyelela kunkanuko zabantu zokubona lezondawo.
“Abantu abanengi abahlala emalokitshini (western suburbs) kabandisanga ukuthatha ithuba lokuvakatshela kumaArt Gallery kumbe ezinye indawo lapho okubukiswa imifanekiso edolobheni.
“Ngakho ngiqale lolu uhlobo lokubonisa ngemifanekiso ekhangele kakhulu ngeze-tourism ngendlela yokukhuthaza abantu ngokwenza babelenkanuko zokuya endaweni lezi,” kulandisa uMubembi.
Ubike ukuba ezokudweba waziqala kuyinto yokuzithokozisa, ngesikhathi enanzelela ukuba umsebenzi wakhe uligugu ebantwini yikho acabanga khona ukuwenza umsebenzi ngomdlandla.
“Thina njengezizalwane zeZimbabwe kasithuthukisi i-tourism yelizwe lethu, akula muntu ongabona ubuhle bethu thina singabuboni.
“Ngikhule ngidweba iloba yisiphi isikhathi emabhukwini kamama ngitsho lawesikolo, ukubala amabhuku abopopayi lakho kwangikhuthaza kakhulu ukuze ngidwebe kuhle.”
“Ngiqeda kuphumelela kuO-level kwakumele ngiqhubekele phambili kodwa ngothando lokudweba ngafuna ukupha isipho sami isikhathi sonke sokuthi lami ngibe ngumdwebi owaziwayo njalo ohloniphekayo,” kuchaza uMubembi.
