uMthunywa
Thokozile Mbedzi
ZISANKEMILE izakhamizi zeWhunga eBeitbridge ngemva kokuba enye indoda igande umkayo ngesando waqaleka andubana izibophele icabanga ukuthi usefile.
Umuyi uRabson Tlou uxabane lomkakhe uNkosikazi Tlou ngeviki ephelileyo kubangwa unkosikazi wesibili obesethethwe ngumkakhe.
Kubikwa uRabson ebona ukuthi usekhulelwa ngumkakhe wadobha isando wamkhanda ngaso ekhanda okubangele ukuthi aqaleke. Kuzwakale ukuthi uRabson wathi ebona umkakhe eseqalekile yena wayazibophela ngoba ecabangela ukuthi usembulele.
Ekhuluma lentatheli kaMthunywa uMnumzana Thabang Sebata oyisakhamuzi uveze ukuthi ababili laba baxatshaniswa yikuthi unkosikazi kaRabson wathi efika endlini wafica umkakhe eselomunye umfazi.
“UmkaRabson wathi efika endlini wafica sokulomunye owesifazana wathukuthela waqala ukuxabana lalowomama andubana umkakhe athi efika axabane laye futhi. URabson kukhanya wacunulwa yikuthi umkakhe wayembuzelani ngesenzo sakhe kungakho wadobha isando wamganda ngaso ekhanda wawa wahle waqaleka.
“Uthe ebona umkakhe esethe daca phansi wacela ezinyaweni wayazibophela, kutsho ukuthi wayecabanga ukuthi usefile,” kulandisa uMnu Sebata.
Uqhubekele phambili uMnu Sebata eveza ukuthi ngenhlanhla uNkkz Tlou waphaphama ngemva kwesikhathi eside kodwa umkakhe wayevele engasekho.
“Lokhu singelankani ngesiga lesi ngoba uNkkz Tlou wayelimele sibili njalo wopha kakhulu, kwakungathi kuhlinzwe inkomo.
“Lokhu siyakuqala esigabeni sethu, asikaze sikubone ukuba umuntu utshaya umkakhe ngesando. Lokhu kuveza ukuba ubevele ehlose ukumbulala kodwa kulwe amadlozi akibo nje,” kutsho uMnu Sebata.
Isikhulumi samapholisa esabelweni seMatabeleland South uInspector Philisani Ndebele ebuzwa ngodaba lolu uthe belungakafiki ewofisini yabo.
“Udaba lwendoda etshaye umkayo ngesando yaqeda yazibophela alukafiki ewofisini yethu njengoba bekulikhefu okutsho ukuthi luzafika,” kuphetha uInsp Ndebele.
