uMthunywa
UMGADLI weKaizer Chiefs, uKhama Billiat, uthi inkinga ngeqembu lakhe yikuthi libuthundu phambili kwegedi.
Kuyamangalisa ukukhuluma kwalumdlali osanda kuhlohla umtshoko webhola kumdlalo weNedbank ngoMgqibelo odluleyo iAmakhosi yatshaya iChippa 4-2.
UBilliat usayine kuChiefs ekuqaleni kwesizini ngemva kokwenqaba ukuvuselela isivumelwano leqembu leMamelodi Sundowns. Bekulendumela yokuthi uzabuyisa ukudlala ngokuzwana loLeonardo Castro abebebhubhisa bonke amaqembu kuSundowns. Kodwa izinto azihambanga ngendlela.
Umdlali lo uhamba phambili ngamabhola kuChiefs kulisizini. Usehlohle ayisithupha. Abanye abagadli beChiefs abangayiboniyo inethi kulisizini nguBernard Parker, Ryan Moon loGustavo Paez olizwa ngendaba ijesi ngaphansi komqeqetshi.
“Singabagadli asiwatshayi amabhola ngezinga esifisa ngalo. Sizama ngakho konke ukusebenza endleleni esixhumana ngayo enkundleni futhi sizame ukwakha amathuba amanengi.
“Singabagadli yinto esizamayo ukuyilungisa lokuqinisana idolo, sesekane ukuze noma ubani onikwe ithuba lokudlala ahlohle,” kusho uBilliat.
IChiefs ilethuba lokujabulisa abalandeli ngokunqoba iNedbank Cup.
Amakhosi yiwo asenqobe inkezo yeNedbank ukudlula wonke amaqembu eMzansi, nanko aseyiphakamise amahlandla angu-13. Acine ukuyiphakamisa ngo-2013 esaqeqetshwa nguStuart Baxter.
“Kodwa ngiyakholelwa eqenjini lethu. Nxa sidlala sizimisele ngokwanele sizanqoba,” kusho uBilliat.
Loba iChiefs isiqede iminyaka inganqobi lutho, ibikade ifinyelela kumidlalo yama-final amanengi. Ngaphansi kobukhokheli bomqeqetshi uSteve Komphela ifike kabili ku-final yeNedbank isehlulwa.
KuMTN8 ikhitshwe yiSuperSport United, kwathi kwiTelkom Knockout yahlulwa yi-Orlando Pirates.
“Kungaba kuhle kakhulu ukuqeda isizini ngendebe senzele abalandeli. Izinto ziya ngokuba nzima kuwo wonke umdlalo esiwudlalayo njengoba sekuzaphela isizini. Kweyendebe sekunzima kulakuqala. Kudinga bonke abadlali ukuthi bagxilise imiqondo yabo, silungise wonke amaphutha esiwenzileyo,” kutsho uBilliat.
— Ubulembu
