Ukhala nge-VAR uBenjie

06 Jun, 2024 - 00:06 0 Views
Ukhala nge-VAR uBenjie Benjani Mwaruwari

uMthunywa

Yintatheli kaMthunywa

KULEMIBONO etshiyeneyo ngokusetshenziswa komtshina oncedisa unompembe kumdlalo wenguqu, iVideo Assistant Referee (VAR).

Abanye bathi kawukhitshwe, abanye bathi ulungile. Kodwa, ingcitshi yomdlalo, owake wadlalela iManchester City uBenjani Mwaruwari ulombono ohlukeneyo. Uthe inkinga ngeVAR yikuthi ivalela phandle ukujabula kwabadlali.
UMwaruwari, odabuka kuleli, wadlala ngesikhathi iVAR ingakayethulwa kumdlalo wenguqu eNgilandi lwakwamanye amazwe aseyisebenzisa khathesi.

Ufake umbono wakhe ngesikhathi kulenkalakatha yocwaningo mayelana ngokuqakatheka kwalumtshina kunguqu eNgilandi.UMwaruwari ukhale ngokuthi iVAR isincitshe abadlali injabulo nxa behlohle ibhola. Uthe usenanzelele ukuthi abadlali bayesaba ukujabulela amabhola abawahlohlayo ngenxa yeVAR.

Ngesikhathi esadlala, uMwaruwari waduma ngendlela ayejabulela ngayo amabhola akhe.Wayethi engahlohla, agijimele ebantwini, afike ebakhombele kathathu, andubana adlulise isandla sakhe esifubeni.

Ekhuluma kuLadbrokes Fanzone, njengokubika kwephephandaba le-The Daily Star kuliviki, uMwaruwari wethule ukukhonona kwakhe ngeVAR, esethula ukuba abadlali sebesaba khona lokulungiselela ukujabula ngoba umtshina lo ungaphangisa uvale injabulo.

“Ngibona engathi iVAR isibulele injabulo yokuhlohla. Akula ofuna ukuzinikela ngokujabulela ibhola elihlohliweyo ngoba ngeke wazi ukuthi kuyaphumani kuVAR. Kuyangisa abadlali lathi njengababukeli ngoba sikhutha ubunandi,” kutsho uMwaruwari.

UMwaruwari, owake wabangukaputeni wamaWarriors uchaze kabanzi ngendlela ayejabulela amabhola ngayo, esithi wayifundiswa nguNwankwo Kanu, owayengukaputeni weNigeria, ngesikhathi bedlala bonke kuqembu lePortsmouth.
“Ngibonga iBritish’s Got Talent ngendlela engangijabula ngayo. Ngiqala ukukukwenza kwakuyisizini ka-2007, emdlalweni wethu wokuvula isizini leDerby County.

“Mina loNwankwo Kanu sasibuka iBritish’s Got Talent, kwaba lensizwa eyayijabula ngemva kokucula kwayo, kodwa yayingazi ukuthi ichaze injabulo yayo ngesiNgisi, ngakho yafika kubabukeli yabakhomba khomba ngomunwe.

UKanu wathi “Benji, yinjabulo enkulu leyo”. Savumelana ukuthi ozahlohla phakathi kwethu uzajabula ngendlela indoda le eyayijabula ngayo.

“Ngenhlanhla, kwahlohla mina, ngaphinda futhi sidlala leManchester United.Ungabuyela muva, ukhangele ilapho engangihlohla khona, uKanu wayengilandela ngoba esazi ukuthi ngizakwenzani. Kwakuhleliwe phakathi kwethu,” kutsho uMwaruwari.
—Ubulembu

Share This:

Sponsored Links

Survey


We value your opinion! Take a moment to complete our survey

This will close in 20 seconds