Intatheli kaMthunywa
UKWEHLULEKA kweqembu leHighlanders ukuthi liyencintisa kumqhudelwano wenkezo ye-Confederation of African Football ngomnyaka ozayo sekudanise umqeqetshi uHendrik de Jongh, osebike ukuba ubekulangazelela ukuyahlasela.
Umqeqetshi lo uthe loba kungasi mlandu wakhe ukuthi iqembu liyedlala, uzahlonipha isinqumo sabadala bethimu okuyibo okumele bachasise ukuthi bami ngaphi ngokuyahlasela ezinye intshantshu ze-Africa. IBosso yathola ithuba lokuthi iyekumidlalo ye-Caf Confederations Cup ngokuba yintshantshu yenkezo yeChibuku ize iqethule iNgezi Platinum nge 1-0 eMagumeni kumaviki amabili adluleyo.
NgoMvulo emini, kungxoxo abelayo lentatheli kaMthunywa, umgcinisihlalo weqembu uKenneth Mhlophe uthe iqembu alisoke liyencintisa ngoba alilamali. Ukuphatheka kunkezo enjengale kudingeka ukuthi iqembu lithole usekelo lwemali oluzwayo.
Ngalokhu, umqeqetshi uveze ukuba udanile kodwa waphikelela ngokuthi uzasekela loba yini okuzakhethwa liqembu.
“Ngingumqeqetshi olesikhathi eside ekunguqu njalo sengisebenze lamaqembu amanengi. Ukuyadlala kunkezo ye-Caf bengikukhangelele kodwa lokho kuya ngokuthi abadala kubhodi yeqembu bazakuthini.
“Akula phela umqeqetshi ongafuniyo ukuyancitisa enkundleni zaphezulu. Mina ngakwenza lokhu leqembu le-AFC Leopards eKenya lakuqembu lesizwe se-Rwanda,” kutsho lumqeqetshi ofike kuBosso waphiwa ibizo elithi Hlabangana.
Kubikwa ibhodi yeqembu izahlala phansi kubotshwe iqhinga mayelana lokuqhubekela phambili besiya kumncintiswano we-Caf. UMhlophe uveze ukuba baphakathi lokuxoxisana labasekeli babo ababalisa inkampani yeNetOne ngalokhu.
Inkampani yeNetOne iphinda isekele leqembu le-CAPS United elilakho ukuthi liphethe isizini liyintshantshu yeligi.
“Sisadinga indlela eyaphambili kodwa iqiniso elaziwa ngamalunga ethu wonke yikuthi iHighlanders ayilamali yokuyancintisa. Sisakhulumisana labo bonke abasincedisayo ukuze sibe lombono oyiwo,” nguMhlophe lo.