YiNtatheli kaMthunywa
NGENXA yomqando obukhona elizweni lonke jikelele kule impelaviki edluleyo, kulendoda yesigabeni seChipale eBinga esele ithoba amanxeba ngemva kokukhahlelwa ngenye kubangwa imbawula.
Kubikwa uMnumzana Jordan Nleya wakhahlela uMnumzana Lungani Dube kubangwa ukuthi ufike waphakamisa imbawula ebabeyotha lemuli yakhe nanko phela kwakugodola.
Intatheli lesinye isakhamuzi sakule indawo uMnumzana Edwin Mvundla owayekhona kuliwa obike ukuba yena wayekubona njengento encane engeke idale umsindo omangalisayo.
“Abantu abalwayo ngabantu abadala abakhulileyo benza esingakukhangelelanga. UDube wafika waphakamisa imbawula uNleya esotha yena esithi uyadlala kanti yayisiwuchithile umuthi inkonyane ngoba wahle wamkhahlela okubuhlungu.
“UDube ebona ukuthi kwasekukubi wahle waphosela phansi imbawula phansi wacela ezinyaweni,” kubika uMnu Mvundla.
Uqhubekele phambili eveza ukuba ulokhe elesithuli ngalokhu.
“Ngasala sengimbuza uNleya ukuba yindaba ekhahlele omunye wathi yena kube liphutha ukuthi amkhahlele kodwa lokhu okokuthatha imbawula kumtshengise ukudelela,” kutsho uMnu Mvundla.
Ekhuluma lentatheli uMnu Nleya onguye owakhahlela omunye uveze ukuba kuliqiniso okukhulunywayo.
“Ukumkhahlela ngamkhahlela angiyali akwenzayo yikudelela ungeke ufike emzini womuntu uthole umkami esotha imbawula wena ufike uphakamise uhambe layo lokhu yikudelela,” kuchaza uMnu Nleya.
Intatheli ixhumane loMnu Dube owakhahlelwayo kubangwa imbawula ovumileyo ukuba wadla phansi sekunzima.
“Mina ngafika koNleya ngathola besotha imbawula ngayiphakamisa ngidlala kanti sengiqale umsindo ngezwa ngesicatulo emhlane vele angizange ngithalaze emuva ngahle ngatshiya imbawula phansi ngadla phansi uyama umuntu akugamule ngehloka,” kuphetha uMnu Dube.