Innocent Kurira
UMQEQETSHI weqembu leHighlanders uKelvin Kaindu uthe abadlali bakhe kumele bakhulise ukuqina kwengqondo ukuze bazwisise ukuthi inkundla yeBarbourfields kumele ibe yinqaba njengoba iqembu lidlale kubi ekhaya kumidlalo edluleyo.
Umqeqetshi lo utsho kanje ngemva kokunanzelela ukuthi iqembu lakhe lidlala ngcono njalo linqoba nxa lisemangweni, libuye lehluleke eBarbourfields.
IHighlanders seyehluleka kumidlalo emibili isekhaya, ibanjwa 0-0 yiTelOne, yabangutshiki lobhanqa 1-1 yiNgezi Platinum Stars.
Ekhuluma ngokukhathazeka kwakhe, uKaindu uthe: “Kumidlalo yethu kuligi sesikhuthe imiklomelo eminengi sisekhaya. Ngithola ukuthi ngaphandle kokumisana leGreenFuel, lapho esaba le-red card, yonke imidlalo senza kuhle.
“Kumele sisebenzele ukuqinisa ingqondo zabadlali ukuze bakwazi ukuqakatheka kokudlala phambili kwabalandeli beqembu eBarbourfields,” kutsho uKaindu.
Umqeqetshi lo uthe ubeke ithemba lokuthola impumela engcono mhla bedibana leGreenFuel kumdlalo weChibuku Super Cup ngempelaviki.
uKelvin Kaindu
“Lo ngumdlalo ozabe usekhaya ngakho kumele siwuqaphele. Ngibona kulithuba lokunqoba. Le yiyo inkezo yokudlalela. Akusoze kube ngumdlalo olula. Nxa singazimisela singaphuma lokungcono.”
Uthe kasoze akhangele muva kodwa uzathi ukukhangela phambili kumdlalo wenkezo lo.
“Okusemuva sekwedlule. Okwakhathesi sikhangele inkezo yeChibuku.”
IHighlanders yaba yintshantshu yeChibuku Super Cup ngesizini ka-2019.
Kweminye imidlalo yeChibuku Cup kulimpelaviki, intshantshu zanyakenye iDynamos zihlangana leZPC Kariba eHarare. ICAPS United idlala leBikita Minerals.
INgezi Platinum Stars izanxusa iBulawayo Chiefs. Iqembu elidabuka eShamva, iSimba Bhora lizadlala leHerentals.
Ama quarter-final omncintiswano lo azaqhutshwa mhlaka 21 Mpandula, ama semi-final azakuba mhlaka 26 Mfumfu.
Umdlalo wokucina umhlaka 30 Lwezi.
