Ethel Ncube
AKUBIZWA ozwayo eZara koBulawayo ngoLwesihlanu ilanga lokuthakazelela uthando, iValentine’s Day nanko phela uJeys Marabini uyabe eqhunsa khona.
UJeys uzakube ehamba loProsper Tshuma.
Intatheli ikhulumisane loJeys Marabini obike ukuba kuzabe kumnandi ngalolosuku.
“Kuzabe kungokokuqala lonyaka ukuba ngitshaye izingoma zami ngizitshaya ngelanga elihle lokuthakazelela uthando. Uthando lumnandi njalo luyinsika yempilo, akukhethekile ukuba luthando lukamama, lwejaha lentombi, lukababa lomama okusalayo siyabe sithakazelela uthando.
Ngizabe ngitshaya ingoma zami uqobo, ezothando yizo ezizahamba phambili kakhulu ngoba lelo phela lilanga elikhulu lokuthakazelela uthando,” kubika uJeys.
Uqhubekele phambili ekhuthaza abantu ukuba babuye bezothakazela ilanga leli.
“Asiqakathekiseni uthando ngoba yilo oluhamba phambili kulayo yonke into. Thatha isikhathi sakho lomuntu wakho loba wedwa ubuye uzotshaywa ngumoya ulalele umculo we-jazz.
“Ukudla lokunathwayo kuyabe kukhona ungakhathazeki wena, qonda eZara uyekholisa labanye. Ngiyalinxusa lonke ukuthi lingaphuthi ngoLweSihlanu ntambama lizozizwela umhlabeleli wenu elimthandayo elipha ukudla kwendlebe,” kuphetha uJeys.
