Ujabulela ikhefu umqeqetshi

11 Oct, 2018 - 00:10 0 Views
Ujabulela ikhefu umqeqetshi UGiovanni Solinas

uMthunywa

UMQEQETSHI weKaizer Chiefs, uGiovanni Solinas, utshengisele ukujabula ukuthi imidlalo ye-Absa Premiership izathatha ikhefu kulimpelaviki.

Kuphazamiseke irekhodi yakhe lokungatshaywa emidlalweni eyisikhombisa ngesikhathi enqotshwa 1-0 yiPolokwane City.

Emdlalweni obungabukelwanga ngumuntu ngenxa yesigwebo seChiefs esithole ngenxa yokuthi abalandeli bayo besolwe ngokuhudulela phansi isithunzi seligi, iChiefs inqotshwe kulandela ishoti etshaywe nguVusumuzi Mngomezulu ngasekupheleni kwehlandla lakuqala.

USolinas ukhale ngokuthi bekuzakuba ngcono ukuba bebewunqobile umdlalo ukuze baye ekhefini behambela phezulu kodwa uthe lizomnika ithuba lokusebenza ngezinto ezithile bese kuvela lesikhathi esikahle sokuthi asile ngokugcwele uLeonardo Castro olimeleyo.

“Uqalile uCastro ukugijima lamuhla ,” kutsho lumqeqetshi.

Lezi yindaba ezimnandi ngendlela engachazeki ngoba ungomunye wabadlali abamqoka kithi. Ithuba elikhona singadlali ngalo lizokwenza ukuthi asebenze kahle lodokotela bengacindezelwa yilutho,” kutsho uSolinas.

Ngemva kwalumdlalo kuzoba khona ikhefu lemidlalo yeFifa kuphinde kuqale leTelkom Knockout. Umdlalo weligi olandelayo oweChiefs omkhulukazi wabakhaya baseSoweto lapho bazobe bekhangelane khona le-Orlando Pirates eFNB Stadium, eGoli.

“Kuliqiniso ukuthi lumdlalo uhlukile kuleminye ngoba abalandeli bathola lethuba lokuchoma. Okumqoka kimi yikuthi senze ibe ngcono indlela esidlala ngayo. Kusemqoka ukuthi sidlale kahle bese siwugcina lowo mgqigqo. Vele kubalandeli lasemlandweni weqembu kuzoba mnandi nxa sinqoba kuyo yonke imidlalo.”

Uthe umdlalo wabo le-Orlando Pirates bawukaqakethiksa kakhulu.

“Akuyona into engiyifake ekhanda leyo kodwa engingakutsho yikuthi ayisekho into yokuthi kukhona amaqembu amakhulu kumbe amancane. I-Highlands Park ifike yathatha umdlalo ngokunqoba iMamelodi Sundowns le-Pirates. Imiklomelo iyafana futhi alwelwa ngendlela efanayo. Ngilijabulele leli khefu elivelileyo ngoba kukhona izinto ezinengi okufanele sizilungise. Kuhle-ke futhi ngoba kunika labalimeleyo ithuba lokusila ngendlela,” kuphetha uSolinas.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds