uMthunywa
Bongani Ndlovu
INYANGA kaNhlangula seyaba lodumo ngokunanzelela labo abenza kuhle emisebenzini yabo yokujabulisa umphakathi ngezomculo lezemidlalo kumcimbi wamaRoil Bulawayo Arts Awards.
Umcimbi wama BAA uzakwenziwa mhlaka 29 kuyonale inyanga njalo ungumcimbi omkhulu kwezokuzithokozisa koBulawayo.
UNombulelo ‘‘Mntase’’ Masoka (39) ongumsakazi kumsakazo weKhulumani FM ukhulume ngokukhethwa kwakhe kumaBAA kusicoco seOutstanding DJ koBulawayo.
“Ngijabule kakhulu ukuba ngomunye wabakhethelwe ukwenza kuhle kumnyaka lo koBulawayo. Ngizancintisela ukuthatha isicoco sokuba nguOutstanding DJ.
“Ngithanda ukubonga i-Khulumani FM ngethuba abangipha lona ukuze ngibe lilizwi lakoBulawayo njalo ngifisela inhlanhla labo engikhethwe labo uCde Phil esisebenza sonke, uDonna loKhekhe abeSkyz Metro FM,” kuchaza uMntase.
Uqhubekele phambili wabonga abalandeli labalaleli bakhe ngokulandela uhlelo lwakhe.
“Ngithanda ukubonga abalandeli be K-lounge eyenza kuKhulumani FM phakathi kwehola lika-6 kusiya ku-9 ebusuku.
“Ngiyajabula ukuthi ibizo lami libe phakathi kwalabo abakhethiweyo lonyaka kutshengisa njalo ukuthi umsebenzi wami uyabukeka njalo lokhu kungipha intshukuntshu yokwenza ngcono,” kuveza uNkszn Masoka.
Uphethe ngokucela abalandeli labalaleli bakhe ukuthi bangakhohlwa ukumvotela ukuze usuku lufika ethole isicoco lesi kumaBAA.
“Ngithanda ukucela abalandeli bami ukuthi bengakhohlwa ukungivotela. Ukuvota kuqale mhlaka 5 Nhlangula njalo yiyo yodwa indlela yokuthi ngiphume laso isicoco samaBAA mhlaka 29 Nhlangula,” kuphetha uMntase.
