UHunt ucacisa ngekusasa likaBilliat eNaturena

25 Mar, 2021 - 00:03 0 Views
UHunt ucacisa ngekusasa likaBilliat eNaturena Billiat Khama

uMthunywa

UMQEQETSHI weKaizer Chiefs, uGavin Hunt, usephumele egcekeni ngekusasa likaKhama Billiat ozaphelelwa yinkontileka laleli qembu laseNaturena maduze. Kunengi ukuqagela ngekusasa lalo mgadli weZimbabwe osehlale amasizini amathathu kuChiefs eyamlanda ngedumela kuMamelodi Sundowns.

Ngokombandela wenkontileka ephakathi kukaBilliat leChiefs, iqembu livumelekile ukwelula ngenye isizini. Okunye osekubikwe kanengi emithonjeni yabezindaba yikuthi uBilliat ungomunye wabadlali abalesipiliyoni abazodilizwa kuChiefs ngoba besolwa ngokubhacaza, lokuyinto eholele ekutheni izinto zibhimbe kakhulu kulakuqala kule sizini.

Kuvela ukuthi ufunwa uthuli ngamaqembu ase-Egypt, i-Al Ahly leZamalek. Ephawula ngoBilliat ngemva kokuthi iChiefs ibuyise isithunzi ngokuqumba phansi omkhaya beSoweto, i-Orlando Pirates, ngo-1-0 koweDStv Premiership obuseFNB Stadium ngeSonto uHunt, uthe: “UBilliat usezinhlelweni ezinkulu zeqembu. Iyangixaka le imbiko ethi akekho ezinhlelweni zeqembu. Ngiyazibuza ukuthi ngempela abezindaba bakuthathaphi lokhu abakubikayo?

Okumqoka njengamanje yikuthi abuye ngamandla njengoba ephuma ekulimaleni. Njengamanje useqalile ukugijima kancane. Ngihlalele emthandazweni wokuthi citshe emasontweni amabili azayo alulame ngokupheleleyo bese simnika noma imizuzu engu-20 athi ukugijima kancane.“

IChiefs ihleli endaweni yesitshiyagalolunye ku-log ngamaphuzu angu-23.

UHunt, obekubonakala ukuthi kumjabulisile ukunqoba iPirates ebesimphendule ithofi, ubuye wancoma indlela uBernard Parker adlale ngayo enkabeni yesisu. Laye uParker ikusasa lakhe aliqondakali eNaturena.

UHunt ubeqala ukwehlula iBucs. Yamtshaya kabili emdlalweni owawundulela owamanqamu eMTN 8.

Sekuhlanganiswe yomibili imilenze eZimnyama zanqoba ngo-5-0. Emlenzeni wokuqala weDStv Premiership ziphinde zanqoba ngo-2-1.

Le miphumela yenze abanye babalandeli baMakhosi baqala bangabaza ubuholi bukaHunt. Lo mqeqetshi uthe bazosebenzisa ikhefu lamasonto amabili lemidlalo yeFifa ukulungisa amaphutha lokwamukela abadlali ababuya ekulimaleni.

Igoli enqobe ngalo iChiefs libe lihle, liqotshelwa enethini umthakathi wezindaba uSamir Nurkovic, wahluleka wancama ukulivimba unozinti uSiyabonga Mpontshane.

IBucs ihlulwa nje bese kuphele imidlalo eyisithupha ingayazi induku. Ukunqoba bekuzoyibeka endaweni yesibili ku-log yeDStv Premiership. Njengamanje ibambe indawo yesine ngamaphuzu angu-35.

Umqeqetshi wayo uJosef Zinnbauer uthe: “Besiwafuna ephelele amaphuzu kodwa izinto azihlangananga.

Ingimangazile indlela iChiefs eqome ukusizuma ekubeni ibidlala esibayeni sayo. Mina angeke ngiliphasise lelo bhola. Bazamile abadlali bami lokho,” kutsho uZinnbauer.

Share This:

Sponsored Links