Uncategorized

UHulumende uxegisa imithetho yokuhamba kwabantu

17 Sep, 2020 - 00:09 0 Views
UHulumende uxegisa imithetho yokuhamba kwabantu

uMthunywa

YiNtatheli kaMthunywa
UHULUMENDE ngoLwesibili uphinde njalo waxegisa imithetho yokuvalelwa kwabantu emakhaya wavumela ukuhamba kwabantu besuka kumadolobho ehlukeneyo kanye lokuvulwa kwamawofisi akoMsitheli.

UHulumende uphinde njalo wavumela ukuthi labo abasebenza kuVehicle Inspection Department (VID) kanye lababona ngokuvakatshelwa kwamanye amazwe abe-Immigration Department le National Museums and Monuments of Zimbabwe (NMMZ) ukuthi baqale ukusebenza.

UMphathintambo obona ngezokukhitshwa kwembiko uMonica Mutsvangwa uthe ukuvunyelwa kwamabhasi athwala abantu esiya kwamanye amadolobho kuza ngesikhathi abantwana besikolo abazabhala imihloliso yabo yalonyaka bekhangelelwe ukuvula izikolo mhlaka 28

Mpandula. Kungakho lokhu kwenzelwa ukuthi ukuhamba kwabo kubelula.

UHulumende uveze ukuthi ukuxegiswa kwemithetho yokuvalelwa kwabantu emakhaya kuhlose ukulinganisa phakathi kwezomnotho kanye lokuvikela impilo.

“Ikhabhinethi ithanda ukugcizelela ukuthi lanxa sekuthethwe amanyathelo la lamuhla (ngoLwesibili) ukuze kuvulwe ezomnotho, ingozi yesifo seCovid-19 isekhona ngempela njalo abantu kumele baqhubekele phambili belandela imithetho yokuvikela ukumemetheka kweCovid-19,” kutsho uMphathintambo uMutsvangwa.

Kubikwa abamabhasi sebekhangelelwe ukuba baqale babhalise kugatsha lwe- Transport and Infrastructural Development. Lokhu kwenzelwa ukuqinisekisa ukuthi bayalandela izinqubo zokusebenza ezijayelekileyo, ama- Standard Operating Procedures (SOP), zohlangothi lolu ukuze zihambelane lemikhombandlela yeWHO lemithetho yeCovid-19.

Ngesikhathi kuqala umthetho wokuvinjwa kwabantu emakhaya ngenxa yeCovid-19 ngenyanga kaMbimbitho, uHulumende wavala ukuhamba kwamabhasi kanye labantu besuka kwamanye amadolobho besiya kwamanye. Lokhu kwakusenzelwa ukuze igcikwane le-corona lingamemetheki lisiya kwezinye indawo.

Amagonyethi yiwo wodwa abesevunyelwa ukuthwala impahla esuka lazo kwelinye idolobho esiya kwelinye kanye lokuchapha umgcele.

Ngenhloso yokuthi abantu bathole incwadi eziqakathekileyo emawofisini kaRegistrar General, ikhabhinethi isivumle ukuthi amawofisi la avulwe ukuze abantu benelise ukuthatha incwadi ezifana lencwadi zokuzalwa, ezokufa, izithupha kanye lamapasipoti.

Kubekwa imithetho ezaqinisekisa ukuthi emawofisini la abantu kabasoze baminyane ngoba kuvamile ukuthi kugcwale abantu emawofisini la.

Share This:

Sponsored Links