uMthunywa
AMAQEMBU ezemidlalo atshiyeneyo elizweni asevunyelwa ukuthi ancintisane, nanko phela uHulumende ubike ukuba inkundla sezingavulwa.
Besekwedlule inyanga eziyisithupha eminye imidlalo ebalisela inguqu ingadlalwa ngenxa yezimiso ezabekwayo ngenhloso yokwenqabela iCovid-19. Kulandela ukunanzelela ukuthi liyehla inani labantu ababulawa ligcikwane leli, uHulumende uthe sekungadlalwa loba yiwuphi umdlalo.
Lezi zindaba ezimnandi kodwa akusoze kuvunyelwe ababukeli enkundleni. Amagedi enkundla avulelwe abadlali kuphela.
UHulumende ugcizelele ukuba abadlali, abaqeqetshi lezinye izisebenzi kumele zihlatshwe ijekiseni yokuvikela iCovid-19 andubana kube lokulolonga kumbe ukuncintisa.
Umphathintambo obona ngezokukhitshwa kwembiko kuHulumende uMonica Mutsvangwa ubikele isizwe ngoLwesibili ukuba ezemidlalo kuzamele zilandele izixwayiso zeCovid-19.
“Ezemidlalo kumele zilandele izinqumo zokwenqabela iCovid-19 njalo zonke izisebenzi kumele zihlatshwe,” kutsho uMutsvangwa.
UHulumende ubike njalo ukuthi usevumele ukuvulwa kwama-gym, okuzakwenza umsebenzi wabaqeqetshi bezemidlalo ubelula ngoba ama-gym abalulekile ekuqiniseni imzimba yabadlali.
Kusenjalo, iphephandaba likazulu likhulume lengcitshi zokuqhutshwa kwenguqu kuleli ezibike ukuthi uHulumende kumele ahlolisise ukuthi amaqembu ayalandela imithetho ekhona.
Ingcitshi lezi zithe isimo esihlasele amaqembu amanengi, esigoqela ukuswela imali, singadala ukuthi kubekhona ukwephulwa komthetho wokwenqabela iCovid-19.
“Ngaphambi kokuba sivule inkundla, asikhangelisise isimo samaqembu. Yiliphi njalo mangaki amaqembu azimisele ukubuyela kungela sizo lwemali,” kutsho enye ingcitshi yezemidlalo esebenza ekolitshini leNational University of Science and Technology, eyale ukuqanjwa ngegama.
Ingcitshi le ithe akungavunyelwa ababukeli okwakhathesi enkundleni ngoba isizwe asikaphephi kugcikwane leCovid-19.
“Kuqakathekile ukuthi singalandeli okwenziwe ngamanye amazwe angenisa ababukeli enkundleni. Asimeni kancane sibone ukuthi siyaphi.”
Abalandeli bomdlalo wenguqu kuleli sebekhalaze ngokuba sebelesizungu. Bakhuluma ngelibuhlungu izwi ebulenjini becela ukuthi kuvunyelwe labo asebehlabe ijekiseni ukungena enkundleni.
Bakhona abalandeli ababikele iphephandaba likazulu ukuthi sebediniwe ngokulandela ibhola laseMzansi laseNgilandi.
