uMthunywa
YiNtatheli kaMthunywa
BAZIBUZA bengatholi impendulo abaqeqetshi, abalandeli lenkokheli zeHighlanders ngodaba lokuthi kungani uPrince Dube ehlohla nxa edlalela iqembu lamaWarriors kuphela?
Umgadli lo usephenduke waba yintandokazi yabaqeqetshi beqembu lesizwe ngenxa yokulibona igedi kumidlalo edluleyo. Kodwa nxa esegqoke ezeBosso, lumdlali akaboni lutho phambili. UDube, odume ngelithi “Mgadafi” enkundleni usehlohle amabhola amabili kuHighlanders kulisizini. Kuqembu lesizwe usebhoboze umambule kahlanu.
Lomgcinisihlalo weHighlanders uKenneth Mhlophe uthe kuyisifiso sabo ukuthi uPrince aqale ukulibhoboza inethi.
“Sihlezi sivule amehlo kuyo yonke imidlalo ukuthi mhlawumbe umgadli wethu uzahlohla. Silalo ithemba kuye ukuthi uzasiphakamisa,” kutsho uMhlophe.
Osabambe isihlalo sikamqeqetshi uMandla Mpofu uthe ilanga likaPrince lizafika.
“Nxa ehlohla lakumaWarriors kutshengisa ukuthi usefomini, useqala ukuvula igedi. Ngilombono wokuthi kumidlalo elandelayo uzahlohla kuphela.”
Ebuzwa ngokudlala kwakhe uDube ubona ikusasa leqembu lakhe livulekile njalo ukholwa ukuthi alisoke liphunyuke kuligi ephezulu kulisizini.
Uthe okwenza azitshele ukuthi iHighlanders izalwela inkezo zonke kuligi yeCastle Lager yikuthi igcwele abadlali abasacathula kulesi isibanga somdlalo, okuyikho okubanikeza igunya lesibindi sokuhlasela.
Kulimpelaviki iBosso ihlangana leDynamos kumdlalo weChibuku Super Cup eHarare.
I-Highlanders okwamanje ihlezi kunombolo yetshumi lantathu ilemiklomelo engu-25 kuphela. Indawo ekuyo kulogu yeCastle Lager le iyethusa ngoba inganqotshwa kumidlalo ezayo, ingaphuma kuligi enkulu.
