uMthunywa
Izabizwana ezikhomba buqamama zakhiwa kuzabizwana zokukhomba eduze. Buyela kusifundo esisenze kuviki ephelileyo lapho esifunde ngokwakhiwa kwesabizwa sokukhomba eduze.
Ezabizwaneni zokukhomba eduze ezilelunga elilodwa u-lo lo –la, sijobelela u-wo. Esabizwaneni sokukhomba eduze esilunga elilodwa u-le sijobelela u-yo.
Nanzi izibonelo: Kusigaba 1 kusabizwana sokukhomba eduze lo- sijobelela u- wo Sithole isabizwana sokukhomba buqamama u/lowo/. Kusigaba 6 kusabizwana sokukhomba eduze la sijobelela u-wo Sithole isabizwana sokukhomba buqamama u/lawo/. Kusigaba 10 kusabizwana sokukhomba eduze le sijobelela u –zo sithole isabizwana sokukhomba buqamama /lezo/.
Ezabizwaneni zokukhomba eduze ezilamalunga amanengi sisusa unkamisa wokucina besesijobelela u –o. Izibonelo: Kusigaba 2a isabizwana sokukhomba eduze ngulab(a) sisusa unkamisa wokucina a sesijobelela u –o sithole isabizwana sokukhomba buqamama labo. Kusigaba 7 isabizwana sokukhomba eduze ngu les (i) sisusa unkamisa I osekucineni sijobelele u –o sithole isabizwana sokukhomba buqamama leso.
Ukwakhiwa kwesabizwana sokukhomba kude
Izabizwana ezikhomba kude lazo zakhiwa kuzabizwana zokukhomba eduze. Sijobelela u-ya ezabizwaneni zokukhomba eduze. Abanye basebenzisa isijobelelo u-yana ezabizwaneni zokukhomba eduze. Izibonelo: Kusigaba 1 kusabizwana sokukhomba eduze u lo sijobelela u –ya sithole isabizwana sokukhomba kude u loya. Kusigaba 15 kusabizwana sokukhomba eduze lokhu sijobelela u-ya sithole isabizwana sokukhomba jude u –lokhuya.
