uMthunywa
Izindlela okusetshenziswa ngazo ubumnini:
1. SINGASEBENZISA ubumnini ukutshengisa ukuthi into ethile yenziwe ngani, kanje: Umganu wesigodo udlelwa inyama esiNtwini.
Ubegqoke ingwane yesigogo.
2. Singasebenzisa ubumnini ekuchazeni ukuthi ulutho lusebenza ngani: Isigayo sephethulo siyadula. Kasisekho kwelakithi isitimela segetsi.
3. Singasebenzisa ubumnini ekuchazeni ukuthi ulutho oluthile lusetshenziselwani: Bamtshontshele izigqoko zomtshado. Uchago lwetiye luvuthiwe.
4. Singasebenzisa ubumnini ukuchaza isikhathi sokusetshenziswa kolutho: Bathi bezimnandi ingoma zesonto. Isinkwa sePhasika sithengiwe.
5. Ubumnini bungasetshenziswa nxa kuchazwa okuphethweyo; Uthwele imbodlela yeFanta. Isaka lamazambane linzima.
6. Ubumnini bungachaza ubulili. Abantu besifazane kumele bahlonitshwe. Umduna wenja lichalaha.
7. Ubumnini bungasetshenziswa ekukhombeni ukulandelana kwezinto. Iviki yokuqala iphele bengenzanga lutho. Lo ngumntwana wokucina endlini yakwabo.
8. Ubumnini bungasetshenziswa nxa kufanekiswa. Lo yinyoka yomuntu ngobuvila. Ubehamba lomgqala wentombi.
Nanku umsebenzi phezu kobumnini. Zama lokhu ukuze ubone ukuthi uzwisisike yini ubumnini. Bhala imitsho usebenzisa ubumnini ngezindlela ezilandelayo:
(a) Ukukhomba ukuthi ulutho oluthile lwenziwe ngani
(b) Ukuchaza okuphethweyo
(c) Ukufanekisa
(d) Ukuchaza ubulili
(e) Ukuchaza ukuthi ulutho oluthile lusebenza ngani
(f) Ukuchaza ukulandelana kwezinto
(g) Ukuchaza ukuthi ulutho oluthile lusetshenziselwani
