Isibanjalo lucezwana olutholakala ngaphansi kwesilandiso loba isenzeko njengesenzo. Isibanjalo ligama elilandisayo elakhiwa lisuselwa kwezinye incezu zenkulumo njengalezi ezilandelayo: emabizweni, ezabizwaneni, ezichasisweni, ezandisweni kanye lezihlanganisweni.
Ukwakhiwa: izibanjalo zakhiwa zisuselwa ezincezwini ezingaphezulu ngokwehlisa iphimbo kunkamisa.
Izibanjalo ezakhiwe emabizweni: Funda imitsho elandelayo: Ubaba uthenge inkukhu. Inkukhu ethengwe ngubaba. Yinkukhu ethengwe ngubaba. Emutshweni wokuqala ibizo “inkukhu” lingumenziwa”. Emutshweni wesibili lowesithathu leli ibizo seliyisibanjalo.
Ake sihlolisise la amabizo lezibanjalo esizakha kuwo ngaphansi kwezigaba ezithile. Kusigaba 1, kubizo umuntu, isibanjalo ngumuntu, abanye bathi wumuntu. Kusigaba 2, kubizo abantu isibanjalo ngu- ngabantu. Kusigaba 1(a) kubizo umalume isibanjalo ngumalume. Kusigaba 2(a), kubizo omalume isibanjalo ngu-ngomalume. Kusigaba 3, kubizo umuzi isibanjalo ngu –ngumuzi, wumuzi. Kusigaba 4, kubizo imizi isibanjalo ngu- yimizi.
Kusigaba 7, kubizo isifo isibanjalo ngu-yisifo. Kusigaba 8, kubizo izifo isibanjalo ngu-yizifo. Kusigaba 11, kubizo uluthi isibanjalo ngu-yiluthi.
Qedisa ukwakha izibanjalo kuzo zonke izigaba. (i) Emabizweni aqalisa ngo a-; Kwehliswa iphimbo kunkamisa –a. Kungehliswa iphimbo kuqaliswe ngesakhi u ng-.
