Arnold Ndlovu
KULENINA elihlala elokitshini leHabane eSigodini elihlawuliswe imali engange $100 ngemva kokutholakala lilecala lokuthethisa umakhelwane walo kanye lokuthi ule-Aids.
Umsolwa uGrey Gugu Ncube oleminyaka engu-39 yokuzalwa ubemiswe phambi komthethwandaba weSigodini esetheswa icala lokuthethisa uMnumzana Alfred Dube esithi ulomkhuhlane weAids.
Umtshutshisi kulelicala uMnumzana Jefter Nyikadzinashe ubikele umthethwandaba ukuthi ngoLwesine kuviki ephelileyo umsolwa waxabana lomamangala kodwa isisusa sengxabano kasisatholakalanga.
Ekuxabaneni kwabo uNcube wathethisa umakhelwane wakhe wathi ngumuntu ogulayo olemikhuhlane eminengi, omunye wakhona ligcikwane leHIV.
Inkulumo kamsolwa ayizange imphathe kuhle umamangala owahle wayamangala emapholiseni okuyikho okwabangela ukuthi abotshwe.
Emiswe phambili komthethwandaba umsolwa ulivumile icala lakhe njalo waveza ukuthi kwakubangelwe yikuthi wayezondile.
Umantshi uTawanda Muchemwa ngemva kokulalelisa icala uthole uNcube elecala waquma ukuthi ahlawule imali engange$100.