uMthunywa
Musa janga
KASAZIFUNI inyosi ebezimnothisa omunye ubaba wePlumtree nanko phela ukhala ngokuthi sezimqedele abantwana kungakho-ke udinga usizo ukuze zitshiyane laye. UMnumzana Tshali Dube kubikwa ucine elayela abantu ukuthi bamdingele umphurofethi Nhlanhla Ndlovu ukuthi azomsiza ukuxotsha inyosi zakhe ebezihlala phakathi kodiwo kanye lenyoka ethi sezimkhathaza nanko phela kasaphilanga lasemzimbeni.
Abasiki bebunda bathi kukhanya uMnu Dube ubethola inotho yakhe ngokusebenzisa inyosi lezi okwesikhathi eside kodwa kukhanya besezimhlanekele kungakho-ke kasazifuni.
NgoLwesithathu ngeviki edluleyo umphurofethi Ndlovu odabuka eGwanda uvakatshele uMnu Dube emzini wakhe elande ukuzamsiza ukukhipha izinto zakhe ezimhluphayo. Intatheli kaMthunywa ikhulumisane lomphurofethi uNdlovu walandisa ngalesi sehlakalo.
“UDube nguye owangibizayo elayelwe ngabanye ngoba inyosi zakhe sezimhlupha. Wayesithi ngibuye ngokuphangisa ngoba kezwa kuhle njalo usehlangane lenhlupho ezinengi ngenxa yomuthi awuthola kudala.
“Wathi usephelelwe ngabantwana ngenxa yenyosi lezi njalo kezwa kuhle emzimbeni kungakho-ke udinga uncedo,” kutsho umphurofethi uNdlovu.
“Ekufikeni kwethu ngoLwesithathu ekuseni safika sathandaza sasesifumana udiwo olwesabekayo olwalulenyoka lenyosi phakathi.
“Senelisa ukubulala inyoka kodwa abanye bami abathathu engangithandaza labo balimala belunywa zinyosi. Balimala kakhulu ngoba sacina sibasa esibhedlela. Ubaba uDube wavuma ukuthi lezizinto yizo ebezisenza ukuze athole inotho kodwa ubengasazifuni kungakho edinge usizo kithi,” kulandisa umphurofethi uNdlovu.
Intatheli kaMthunywa izame ukuxhumana loMnumzana Tshali Dube kwehlula ngoba ucingo lwakhe belungangeni.
