uMthunywa
Thokozile Mbedzi
AMAPHOLISA achwayisisa icala lokuzama ukubulala ngemva kokuba kulinyazwe elinye inina eWoodlands Phase 1, eShangani kulandela ukuhlahlelwa ngehloka yizigebengu ezintathu zifuna isisefa semali.
Kubikwa ukuthi uHerbet Chawatama oleminyaka engu-23 uhlahlele uCharmaine Musewe oleminyaka engu-20 ngehloka efuna isisefa semali.
Mhlaka 25 Zibandlela ngehola lesithathu ngemva kwemini umamangala wayesendlini wezwa kulomuntu oqoqodayo wayavula engazi ukuthi usezithezele olulenkume.
uInspector Emanuel Mahoko
Kubikwa uChawatama wahle wambamba ngomphimbo waqala ukumkhama kukanti abanye abathathu baqala ukuthi bafuna amakhiye esisefa. Omunye wabetheswacala laba wahlahlela kanye uMusewe ehlombe wasebatshengisa lapho okwakulamakhiye khona. Abathathu bavula isisefa batshontsha imali engange US$160 eyayiphakathi batshiya uChawatama esilwa loMusewe.
Omunye umakhelwane kaMusewe owananzelela okwakusenzakala wabikela abanye omakhelwane abancedisa ukubamba umetheswacala.
Isikhulumi samapholisa esabelweni seMidlands ulnspector Emmanuel Mahoko uthe bavule icala lokuzama ukubulala eliphenywa ngamapholisa eGweru Central. “lnhlanhla eyenzakalayo yikuba lokhu kusenzakala omunye wabomakhelwane wananzelela watshela abanye omakhelwane abahle baphuthuma benelisa ukuba bahlasele isela leli.
Imali
UMusewe wathwalela esibhedlela kunye lesela leli ngoba selitshaywe ngabantu.
“Abasolwa abathathu basadingwa ngamapholisa ngakho sicela uzulu ongabe elolwazi ngokuthi bangaphi atshayele amapholisa aseduzane laye,” kuphetha ulnsp Mahoko.
