uMthunywa
Ethel Ncube
ZISATHITHIBELE izakhamizi zakuVillage 10 eFilabusi kulandela ukuzwa ngamadoda amahlanu aphendukele enye indoda ebizama ukubalamula bayisusela amanqe.
Kubikwa isehlakalo lesi senzakale kumaviki ambalwa asanda kwedlula.
Abetheswacala abathi uWilson Ndlovu oleminyaka yokuzalwa engu-27, uMpilo Ndlovu oleminyaka yokuzalwa engu-20, uPower Ncube oleminyaka yokuzalwa engu-25, uNkanyiso Ncube oleminyaka engu-25 yokuzalwa loWinile Ndlovu bonke abahlala kuVillage 10 kubikwa bathi bexabana uTobias Sibanda wathi ezama ukubalamula bahle bamphendukela bamhlahlela ngehloka wafela lapho.
UMthunywa uzwe udletshana lokuba abasolwa ababili kulaba abahlanu ngabantwana bakasobhuku wakule indawo.
UMthunywa uxhumane lesinye isakhamuzi uMnumzana Sibhekiwe Mpofu oveze ukuba bazibuza imibuzo engadingimpendulo ngesehlakalo lesi.
uInspector Loveness Mangena
“UTobias bamlandela ezitolo ehamba lomnawakhe abanye laba behlome ngezinduku lamahloka. Uthe ebona umnawakhe etshaywa wasezama ukukhulumisana labo elamula kanti usezithezele olulenkume ngoba bahle bamvukela bamtshaya ngenduku ababelazo abanye bamhlahlela ngehloka bamfulathela.
“UTobias wathathwa ngabanye bamgijimisela esibhedlela seFilabusi ngokuswelakala kwenhlanhla wedlula emhlabeni. Umnawakhe onguye owayetshaywa, uBrian Sibanda wasinda, kodwa wathungwa engalweni,” kuchaza uMnu Mpofu.
Intatheli ixhumane lesikhulumi samapholisa eMatabeleland South uInspector Loveness Mangena ofakaze ngendaba le.
“Sichwayisisa ngendaba yamadoda amahlanu etheswa icala lokubulala umuntu okubikwa wayezama ukubalamula.
“Sicela uzulu asincedise ukuthi sibambe ababili abathi uWinile Ndlovu loWilson Ndlovu ababaleka ngemva kokudala lelicala. Sixwayisa uzulu ukuthi nxa ethe waba lengxabano abize omunye owesithathu abancedise kumbe bathole ukwelulekwa,” kuphetha uInsp Mangena.
