uMthunywa
YiNtatheli kaMthunywa
KUBOTSHWE owesilisa weCaesar Mine, eMutorashanga, eMvurwi, esolwa ngokubulala umntanakhe ngoteketa ecabanga ukuthi yinyamazana.
Isikhulumi samapholisa eMashonaland Central, u-Inspector Milton Mundembe, uthe uTukai Sinoya (32) oyisakhamuzi sakule mayini ukhangelane lecala lokubulala umntanakhe uFortune Sinoya (7) abehlala laye.
U-Insp Mundembe uthe umsolwa kubikwa wayesuka ebhawa yeNgoroni emini ngehola lesithathu lapho ayenatha khona labanye bakhe wayalala njengomuntu ophandliweyo.
“Isiga lesi senzakale mhlaka 7 Zibandlela lonyaka lapho uTukai Sinoya athi ephuma etshwaleni ngehola lesithathu ntambama wathola umntanakhe edlala labanye emzini kamakhelwane.
Indoda le yajumeka ngesikhathi umntwana eqhubeka ngokudlala labanye,” kutsho u-Insp Mundembe.
Kwathi ngabo-7 ntambama umntwana wangena esengoyalala loyise embhedeni owodwa.
“Ngezikhathi zika-11:00 ebusuku uTukai Sinoya wavuka ‘wacabangela’ ukuthi umntanakhe yisilwane esingene endlini yabo.
Wathatha ihloka ngaphansi kombheda wagamula umntwana kathathu ekhanda, wahle wafa.
“Indoda le yasithwala isidumbu somntwana ehlombe yaqonda enkambeni yamapholisa eCaesar yafika yathi ibulele umntwana icabanga ukuthi yisilwane,” kutsho uInsp Mundembe.
Ngemva kwalokho amapholisa athatha umsolwa aqonda emzini wakhe afica ihloka alisebenzisa ukubulala umntwana kanye lechibi legazi.
“Indoda le ibotshelwe icala lokubulala umntanayo, isidumbu somntwana sihanjiswe esibhedlela seConcession ukuze sihlolwe,” kutsho u-Insp Mundembe.
