Arnold Ndlovu
NGENXA yobukhwele kulenina leSigodini elizapika iminyaka emibili lisebenza nzima ejele kulandela ukwehluleka ukuzikhuza nanko phela kubikwa ligamule umakhelwane walo kabili ekhanda kanye lasemgogodleni ngemva kokubona izithombe zakhe kumakhalekhukhwini womkakhe.
Umsolwa uSiphilisiwe Mazula oleminyaka yokuzalwa engu-26 ohlala esiqintini seZhilo khona eSigodini umiswe phambi komthethwandaba weSigodini kuviki ephelileyo esetheswa icala lokuzama ukubulala.
Umantshi kulelicala uMnumzana Tawanda Muchemwa uzwe ukuthi mhlaka 17 Zibandlela uMazula wahamba emzini kaMelody Sibanda (29) esithi uyacela amahlamvu embambayila ukuthi ayehlanyela esivandeni sakhe.
Ngemva kokuphiwa amahlamvu la umetheswacala wacela ukuthi umamangala ukuthi amphelekezele emzini wakhe, bathi befika umsolwa wathatha umakhalekhukwini womkakhe watshengisa umamangala izithombe zakhe ezazilapho wasemethesa icala lokuthandana lomkakhe.
Ngaleso sikhathi kulapho abaqala khona ukuxabana ngokucwayiza kweso umsolwa wadobha ihloka wahlahlela umamangala kabili ekhanda wamphinda njalo emgogodleni.
Umtshutshisi uMnumzana Jafter Nyikadzinashe ubikele inkundla ukuthi umamangala wahlaba umkhosi ebaleka wenelisa ukuyafika enkambeni yamapholisa lapho amangalela khona uMazula andubana yena agijinyiselwe esibhedlela seSigodini.
Umsolwa ebuzwa ngecala leli kazange adlalise isikhathi senkundla ngoba ulivumile.
Incwadi kadokotela isetshenziswe njengobufakazi ekuthonisisweni kwecala leli.
Ngemva kokulalesisa icala leli umantshi uMnu Muchenwa uqume ukuthi umetheswacala ayepika ejele inyanga ezingu-24 andubana esulelwe inyanga eziyisithupha kukhangelelwe ukuthi kasoze enze icala elifana laleli eminyakeni emihlanu elandelayo.