uMthunywa
Thokozile Mbedzi
ZILOKHU zinkemile izakhamizi zepulazini lePhongophongo eFort Rixon kulandela ukuzwa ngenye indoda ehlahlele umakhelwane wayo ngehloka izondele ukuthi kungani ethe enganathi amanzi ngomlomo enkonxeni.
Isehlakalo lesi senzakale mhlaka 20 Mabasa ngehola lesikhombisa ntambama lapho umetheswacala uTapson Mpofu afike emzini kaNever Sibanda oleminyaka engu-58 wanatha amanzi enkonxeni ngomlomo, wathi ekhuzwa wasezonda wayathatha ihloka wafika wahlahlela uSibanda ekhanda.
Ekhuluma lentatheli kaMthunywa uMnumzana Edwin Moyo uthe babone imbedumehlwana.
“Sibone into yamehlo, silapha kasilankani ngokwenziwe nguMpofu, ofike emzini kaSibanda wanatha amanzi ngomlomo enkonxeni wasekhuzwa yena wahle wathukuthela.
“USibanda kazange amthethise kodwa wamtshela ukuthi asebenzise inkomitsho, yena waphuma waya emzini wakhe wafika wadobha ihloka lakhe wabuya wafika wamhlahlela ngalo ekhanda,” kuchaza uMnu Moyo.
USibanda wahle wawela phansi waquleka, uMpofu wacela ezinyaweni.
“Kunje silokhu sethukile ukuthi wayengenwe yini uMpofu aze atshengise ukudelela okungaka yena esemzini womuntu.
Omele isikhulumi samapholisa esabelweni seMatabeleland South uAssistant Inspector Thandolwenkosi Moyo ebuzwa ngodaba lolu uthe solufikile kibo.
“Udaba lwendoda egamule enye kumbango wokuba kungani omunye enathe amanzi enkonxeni ngomlomo solufikile ehofisini yethu.
“Sikhuthaza uzulu ukuba ehlukane lodlame lapho bexazulula inkinga abahlangana lazo ngoba okonwe ngomlomo kulungiswa ngawo futhi.
“Abantu kabadinge abanye abangabancedisa abadala loba babikele abaphathi bezigaba,” kuphetha uAsst Insp Moyo.
