Uncategorized

Uhlahlela omunye kathathu kubangwa imali yegolide

20 Jun, 2024 - 00:06 0 Views
Uhlahlela omunye kathathu kubangwa imali yegolide USD notes

uMthunywa

Ethel Ncube

KULENDODA yeRedcliff esele ibonga amadlozi akwabo ngemva kokuba ihlahlelwe ngomunye ikhanda, intamo langemva kwendlebe ngehloka kubangwa imali yegolide abalithengisileyo akade beyabelana. Isehlakalo lesi senzakale kuviki ephelileyo lapho uMeluleki Ndlovu ahlahlela khona uTalent Mutorino.

Kuzwakale ukuthi uNdlovu loMutorino babelegolide ababelithengisa bathe sebelithengisile baba lokungazwisisani ngesikhathi sebesabelana imali okuyikho okwabangela ukuthi uNdlovu acine ethatha ihloka ehlahlela uMutorino kathathu andubana adliwe ngumswenya.

Kubikwa uMutorino wasala ethe daca phansi wancedwa ngenye indoda eyayisedlula eyahle yamgijimisela esibhedlela seRedcliff wasedluliselwa esibhedlela seKwekwe lapho alokhu elaliswe khona.

Kusenjalo kuleqembu labantu eShurugwi elifike latshaya omunye ezitolo lamtshiya esesimeni esibi kodwa wayadlula emhlabeni esesesibhedlela, Kubikwa ukuba uTyson Matarise oleminyaka engu-36 yokuzalwa wayezinathela utshwala ezitolo, kwatshutsha iqembu labantu elazakala ngokuthi ngelakoMdhimbani kumbe MaNdebele elafika lamkhetha lamtshaya.

Kubikwa wazama ukubaleka kanti kabuzanga elangeni bamgijimisa baze bambamba bamgwaza ngengqamu kanengi bamtshiya elele phansi evuza igazi. Omunye owayezihambela wamthwala ngemota wamusa emapholiseni afika amhambisa esibhedlela seShurugwi lapho afika alaliswa khona wedlula ngelanga elilandelayo.

Abetheswacala bonke lokhe bengakabanjwa. Intatheli ixhumane lesikhulumi samapholisa eMidlands, uInspector Emmanuel Mahoko obike ukuba amacala anjalo afikile kuye.

“Amapholisa asachwayisisa ngendaba lezi njalo sicela ongasincedisa ngokuthi iqembu lakoMudhimbani kumbe uMaNdebele azise amapholisa aseduzane.

“Sidinga njalo umuntu olimaze uTalent Mutorino, ongabe esazi owenza lokhu sicela asincedise ukuze abotshwe,” kuphetha uInsp Mahoko.

Share This:

Sponsored Links

Survey


We value your opinion! Take a moment to complete our survey

This will close in 20 seconds