
Ethel Ncube
SELIHLEZI liphethe izibindi ngezandla ixhegu elileminyaka engu-91 leFox Farm bucwadlana leTshabalala Sanctuary ngemva kokuhlahlelwa ngehloka labuye lagwazwa ngomkhonto ngumakorokoza obecele indawo yokuhlala emzini wakhe esola ukuthi umkakhe ubalekile.
Indaba le yenzakale ngoMgqibelo ebusuku lapho uMisheck Moyo (91) ahlahlelwa khona ekhanda wabuye wephulwa isandla ngumakorokoza owaziwa ngokuthi nguJabu nje kuphela.
Intatheli ikhulume lelunga lomdeni eliveze ukuba bahlalele evalweni.
“Ukhulu ngumalume wami ngahamba ngayambuza ukuthi lumuntu amgcinileyo uyamazi yini uzagcina labantu abangayisibo. Ngakhulumisana laye wathi yena lumuntu uyamazi ngumzukulu wakhe sambuza ukuthi ngowangaphi esingamaziyo.
“Kuthe ngoMgqibelo sezwa kuthiwa ukhulu uselimele seganyulwe ngumakorokoza lo abehlala laye esithi ufuna umkakhe owayesebalekile.
“Wabuye wadlula lemzini wami edinga umkakhe ngala ukuvula umnyango. Ngaleso sikhathi wayevele esegamule ukhulu. Umfana lo ukuthi kibo kungaphi akwazakali njalo lokhe wadala icala leli kabonakali ukuthi waqonda ngaphi,” kulandisa ilunga lomdeni leli elingathandanga ukuqanjwa ngebizo.
Ekhuluma lentatheli uMnumzana Misheck Moyo uveze ukuba usebuhlungwini.
“Umfana lo wafika ebusuku wacela indawo yokulala ngamnika wabuya lomkakhe. Ngemva kwamalanga amabili ehlala lapha waphenduka ntambana wathola unkosikazi wakhe engekho.
“Wahamba kodadewabo kankosikazi wakhe wayabuza ukuthi umkakhe ungaphi wamswela. Waphenduka kimi wathi ufuna umkakhe ngathi mina angimazi ukuthi ungaphi. Kuthe kunjalo wasukela ubaba engihlala laye wathi uzaqala ngaye ukumtshaya wamgamula laye ngehloka ekhanda. Mina ngazama ukuthi ngiphume phandle wahle wangigamula ekhanda, wangigwaza ngomkhonto watshaya lesandla sephuka. Khonapho engihlasela wayephethe elokhu ethi ngithule. Salwisana laye waze wama ukulwa kodwa mina ngivele sengilimele,” kutsho uMnu Moyo.
“Umfana lo wathi kimi ibizo lakhe unguJabu uvela eLupane. Emapholiseni ngihambisile udaba lwami bathi ngihambe eUnited Bulawayo Hospitals (UBH) bona bangidlulisela eMpilo lapho engifike ngathungwa khona ngafakwa lesamende engalweni,” kubika uMnu Moyo.
Isikhulumi samapholisa eMatabeleland South uInspector Loveness Mangena uqinisekise ngendaba le.