uMthunywa
Nkosilathi Sibanda
KUNGABA yisizini yombuso weqembu leTalen Vision nanko iqembu leFilabusi leli selibike ngokuzimisela kwalo ekuthini libeyintshantshu yeligi yeZifa Southern Region Division One.
Iza ngomfutho iTalen Vision okokuthi wonke amaqembu adibana layo aseqhuqha, esesaba ukuhlohlwa amabhola amanengi kuloba yiphi inkundla yeligi le.
Ukuqina kwayo kubonakele ngesikhathi iTalen Vision inqoba omakhelwane bayo koGodlwayo iJordan Sinnot 2-1 enkundleni yeLuveve ngoMgqibelo.
Loba iJordan Sinnot izame ukulwa, yehlulwe yibungcitshi lokugijima kwabadlali beTalen Vision, abatshengisele ukungakhathali umdlalo wonke.
Kube lokulwa okunzima kulumdlalo, nanko lomqeqetshi weJordan Sinnot uJohanisi Nhumwa unikezwe ikhasi elibomvu ngunompembe kulandela ukuklolodela onompembe.
Uphume enkundleni esegane unwabu, elandisa ngokuqilwa ngonompembe.
Kuhlangothi lweTalen Vision, umqeqetshi walo uMiroslov Nemec uthe sebeqalile ukucenta indlela yokunqoba.
Ekhuluma loMthunywa ngemva komdlalo, uNemec, odume ngelithi “Coach Miro” uthe utshele abadlali bakhe ukuthi bengatatazeli, kodwa bazithemba.
“Akula qembu esilifaka phezulu ngoba sincintisana lawo wonke. Abadlali bethu kuzamele bafake ibhola phansi, bedlale umdlalo wabo esiwaziyo ukuze sinqobe,” kutsho uNemec.
Ngomnyaka odluleyo leliqembu kwakukhangelelwe ukuthi leqe umzila lingene kuligi ezwayo eyeCastle Lager kodwa lakhutha ugatsha kancane.
Kumasizini amabili adluleyo iTalen Vision yilo iqembu elathola udumo ngethalenta elilalo nanko phela abadlali balo bebehlohla ukwedlula abamaqembu amakhulu kuleli.
ITalen Vision okwamanje iphethe imiklomelo engu-16 ngemva kwemidlalo eyisithupha. Ilandela iqembu leZPC Kariba lalo elimiklomelo efanayo phezulu kwengalane.
Nansi impumela yemidlalo:
Emakhandeni Pirates 0-3 Adachi, Main Line 1-1 DRC, Arenel 1-0 Indlovu Iyanyathela, Casmyn 0-0 Bosso 90, ZPC 7-0 Binga Pirates
