uMthunywa
Nkosilathi Sibanda
UMQEQETSHI weHighlanders omutsha uMark “Hadebe” Harrison umangaliswe yikuhleleka kwenhlelo zeqembu, ikakhulu ukuziphatha kwabalandeli bayo.
Lumqeqetshi uhlale inyanga eziyisithupha elinde lumsebenzi eseNgilandi.
Uthe efika mhlaka 17 kulinyanga enkundleni yendizamtshina eye-Joshua Mqabuko Nkomo International Airport, uphiwe ibizo elithi Hadebe.
Akula mqeqetshi weBosso osowake waphiwa ibizo masinyane kungakabonakali ukuthi uyingcitshi enkundleni. UHarrison laye uveze uthando olukhulu kubalandeli beBosso abike ukuthi wafisa ukuba seduzane labo ngesikhathi esaqeqetsha iCaps United leHarare City.
Ubike engakufihli ukuthi wayevele efuna ukuqeqetsha iHighlanders kudala. Ubika ukuba kumaqembu wonke asewabonile kuleli, akula elimkhanga njengeBosso.
Iphephandaba likazulu lithole ukuba uHarrison kwakumele kube nguye ozaqeqetsha Amahlolanyama endaweni kaHendrik de Jongh ngoMpandula ngesizini edluleyo.
“I-Highlanders liqembu elidala njalo elikhulu kulawo wonke elizweni. Lilabalandeli abanengi futhi. Yikho lokho okungifuqele ukuthi ngikhethe ukuza kulo.”
Ukhulume ngodaba lokubuyisa inkezo yeligi koBulawayo, okuyinto ezaqinisa ubudlelwano bakhe labalandeli.
“Ngisemsebenzini lo ukuze ngincedise iqembu ukuthi lithole iligi.
Kumele ngikwenze lokhu kulisizini. Kungehlula, kutsho ukuba kuzamele kube ngomnyaka ozayo.
Kusenjalo, amathimu eHighlanders wonke aqale amalungiselelo esizini yalonyaka. Iqembu le-Bosso 90 elitshibilika kunkundla zika-Division One liqale ukugijimisa abadlali balo ngo-Lwesibili emini eHighlanders Clubhouse.
Bekunyakazela ngelanga lakuqala lapho okuze abadlali abedlula i-80. Kubadlali laba bekulenengi eliphuma eNyathi, eLupane, eMbembesi, Kezi, Plumtree, Gweru, Zvishavane, Mberengwa laseGwanda.
Iqembu elikhulu eliphethwe nguHadebe liqalise ukulolonga ngoLwesithathu enkundleni yeWhite City.
