uMthunywa
YiNtatheli kaMthunywa
BANGABE belandelwa ngamashwa abafana beqembu lamaWarriors ngokukhitshwa kwabo masinyane kumqhudelwano we-Afcon nanko phela omunye umdlali kunakanelwa ukuthi usezaxotshwa liqembu lakhe.
Kubikwa uTeenage Hadebe, imvimbi edlala kuqembu leKaizer Chiefs isendleleni yokuphuma kuleliqembu ngesizatho esingacaciyo. Imbiko ekhona iveza ukuba Amakhosi azatshiyana loHadebe ngenxa yokuthi sebebanengi abadlali abaphuma kwamanye amazwe.
Kuthiwa uHadebe kuzamele avulele abanye bezodlala nanko iChiefs isithenge abadlali abathathu uJames Kotei oweGhana, uLazarous Kambole oweZambia loSamir Nurkovi owe-Serbia.
Iqembu ngaphansi kweligi yeAbsa livunyelwa abadlali abavela kwamanye amazwe abahlanu kuphela, kodwa okwakhathesi kulabadlali abayisikhombisa kuChiefs.
Abafakazi abaqotho abaveze loludaba bathe uHadebe uzasuswa elomunye umdlali uLeonardo Castro.
Loba umfakazi ochatheke udaba ekhulelwe luvalo lokuqanjwa ngebizo, uzamile ukuthi akhiphe okusemfihlweni enkundleni yeNaturena.
“NguHadebe loCastro abahambayo. Yibo indlubu ewele ephokweni. Sikhuluma nje uTeenage usekwazi njalo sikhangelele ukuthi ahlangane leqembu kuliviki,” kutsho lumfakazi oseSouth Africa.
Iphephandaba likazulu lincwetshe indlebe ngabafakazi abaseduzane lokwenzakala kuHadebe leKaizer Chiefs ababike ukuba lumdlali ufele ukudlisa iqembu.
“Nxa sikhumbula sonke, uHadebe wancitshisa iqembu inkezo yeNedbank mhla inqotshwa yiTS Galaxy.
“Nguye owadala ukuthi kuphiwe iTS Galaxy umbekwa. Iphutha lelo lamgcoba udaka. Kwazonda abanengi.”
Kusenjalo, omunye umdlali weZimbabwe kuKaizer Chiefs uKhama Billiat ulakho ukuyadlalela iRja Casablanca. Umdlali lo usefunwa linengi lamathimu aseNorth Africa, ikakhulu emazweni eMorrocco le-Egypt.
