uMthunywa
UMDLALI wakuleli uTeenage Hadebe usele ebambe umoya labanye kuqembu leYeni Malatyaspor kulandela ukunqotshwa nge 4-0 ezandleni zeSivasspor kunkezo yeTurkish Cup.
Abadlali beYeni Malatyaspor bazame behluleka ukuthi balichaye ibhola ngendlela abayijwayeleyo nanko batshonele ukugijimisa izithunzi sonke isikhathi enkundleni kulumdlalo obungoMvulo.
UHadebe odume ngelithi “Tinaro” kunguqu uwuqedile umdlali ephakathi kodwa kwehlula ukuthi avimbe amabhola adlule kumduli wemvimbi zeqembu lakhe.
Kumidlalo elandelayo, iYeni Malatyaspor kuzamele inqobe ngokuhlohla amabhola amanengi kumdlalo wayo weligi leqembu le-Instabul Basaksehir. UHadebe labanye bakhe bazaphinda bahlangabeze iSevasspor njalo kuhlandla lesibili kunkezo yeTurkish Cup mhlaka 23 kuZibandlela.
Loba benqotshiwe kowenkezo, uHadebe ulokhe ekholelwa ukuthi iqembu lakhe liqinile lokuthi lizaphenduka ngokunqoba. Ukhulume lokhu ezitshaya isifuba esithi abalandeli bangesabi.
“Sizavuka futhi. Umdlalo wenguqu unjalo. Ngokubona kwami, akula ngitsho loyedwa umdlali othabayo nxa isimo sinje. Sifuna ukudlala sitshengise abalandeli ukuthi silande ukuzonqoba enkundleni.”
Umdlali lo ochinse ukudlala kunguqu ephakemeyo kwele-Turkey uthe kumele aphakamise isisindo somdlalo wakhe ngaso sonke isikhathi.
Phezu kwalokhu uthe ukhuleka njalonje ukuthi uNkulunkulu abaphathise ukuze aqhubekele phambili ngomdlalo. UHadebe ungomunye wabadlali abasakhulayo abathenjiweyo kuqembu lesizwe ama-Warriors. – Ubulembu
