uMthunywa
Listen Ndlovu
KULENDODA yakoBulawayo ehlaselwe endlini yayo, elokitshini leLobengula West yagwazwa ekhanda lasemlenzeni yafa.
Umufi uLangelihle Dube obeleminyaka yokuzalwa engu-52 uhlaselwe yizigebengu emzini wakhe mhlaka 8 Nhlangula.
Kubikwa umamangala ongunkosikazi kamufi, lomufi babelele endlini yabo lapho abezwa khona umsindo emkulwini wabo.
Umufi wavuka esiyakhangela waseqala ukulwisana labetheswacala abane uMaxwell Mpofu, Brian Moyo oleminyaka engu-22, Lucky Sibanda oleminyaka engu-26 loKelvin Njabulo Dube oleminyaka engu-30.
Umamangala waphuma endlini yokulala elandela umkakhe wafuqelwa emuva ngomunye wabetheswacala owaphinda wathi ufuna imali bamnika iUS$20 wathatha labomakhalekhukhwini ababili badliwa ngumnyama.
Umamangala wasala ephuma eqonda emkulwini wathola umkakhe elele phakathi kwechibi legazi egwazwe ekhanda lasemlenzeni njalo esopha kakhulu.
Intatheli ikhuluma lesikhulumi samapholisa koBulawayo uInspector Abednico Ncube uthe indaba le isezandleni zamapholisa.
“Samukele umbiko lapho izigebengu ezine ezangena kwenye indlu eLobengula West zagwaza oyedwa ekhanda lemlenzeni. Isidumbu sahanjiswa esibhedlela se-United Bulawayo Hospitals.
“Amapholisa eCID achwayisisa ngokubulawa komuntu esebenzisana ndawonye lomphakathi athola umlayezo othi uMaxwell Mpofu ngomunye owaphetheka ekubulaweni kukaLangelihle, wasebotshwa. Ekuchwayisiseni wacina echaze abanye bakhe abathathu, futhi uncedisa amapholisa ukuthola omakhalekhukhwini abatshontshwayo.
“Amapholisa athola njalo umbiko ngabathathu asebesezandleni zamapholisa ababecatshe endaweni ezitshiyeneyo. Ukubotshwa kwalaba abasolwa ngokubulala yimpumela yokuthembeka okukhona kwabomthetho labantu bakoBulawayo.
“Sixwayisa umphakathi ukuba uqhubeke usebenzisana lamapholisa ekukhupheni abonayo koBulawayo. Abasolwa bazamiswa emthethwandaba ensukwini ezizayo,” kutsho uInsp Ncube.
