uMthunywa
Thokozile Mbedzi
ZILOKHU zithithibele izakhamizi zelokitshini le-Old Lobengula koBulawayo ngemva kokuba enye indoda itholakale ithe daca phambi kwentuba yakomakhelwane wayo ilamanxeba okugwazwa.
Umuyi obeleminyaka engu-67 yokuzalwa esingeke saveza igama lakhe ngoba kulezihlobo ezingakaziswa, kubikwa watholakala ekuseni mhlaka 19 Mpandula phambi kwegedi lakomakhelwane eqalekile.
Kucatshangelwa ukuba indoda le yathi ivela ebhawa yeMinyela yehlelwa liyezi elimnyaka yagwazwa andubana itholakale ekuseni ilele ilamanxeba.
Ekhuluma lentatheli kaMthunywa uMnumzana Busani Banda uthe balokhe bethithibele ngesiga lesi.
“Umdala ubevela natha ebhawa wasehlangana lomunye umama ongumakhelwane othengisa impahla ezitolo laye ohlala e-Old Lobengula basebebambisana indlela.
“Ababili laba bathi sebephambili behlukana, inina leli seliqonda endlini yalo.
“Kukhanya ngemva kwalapho yikho ahlangana khona lezigebenga ezamhlasela zamgwaza.
uInspector Abednico Ncube
“Umdala ubelamanxeba amabili elihlweni lesandleni sokhohlo njalo wayesopha emakhaleni.
“Abantu bazama ukubiza i-ambulensi khonapho ngabo 5 ekuseni yamthwalela esibhedlela seMpilo lapho edlulela khona ngehola lesithathu ngemva kwemini,” kulandisa uMnu Banda.
Isikhulumi samapholisa koBulawayo uInspector Abednico Ncube ebuzwa ngodaba lolu uthe solufikile ehofisini yabo.
“Samukele umbiko wendoda etholakale egedini lakomakhelwane igwaziwe njalo iqulekile.
“Indoda le ibilamanxeba phezulu kwelihlo lesandleni sokunxele njalo isopha ngamakhala.
“Umbiko we-post mortem uveze ukuthi indoda le ibulewe,” kutsho uInsp Ncube.
Uphethe ngokucela uzulu ongabe elolwazi mayelana lokufa kwalindoda ukuthi azise amapholisa aseduzane labo.
