uMthunywa
Thokozile Mbedzi
KULENDODA yeNeta eMberengwa egebhe igodi yakhafula amathe andubana ifunge ukuthi ngeke iphinde ingene ebhawa kulandela ukusala iphethe amathumbu ngezandla kuviki ephelileyo ngoba yale ukuthengela enye indoda utshwala.
Kubikwa uRabison Ncube oleminyaka engu-47 yokuzalwa wathi esebhawa mhlaka 5 Nkwenkwezi walandwa ngenye indoda angayaziyo yathi ifuna amthengele utshwala wala kanti yayisiwuchithile umuthi inkonyane ngoba umetheswacala wahle wakhipha ingqamu esikhwameni wamgwaza esiswini amathumbu asala egcekeni.
Ekhuluma lentatheli kaMthunywa uInspector Emmanuel Mahoko uthe umetheswacala esenze icala leli wafulathela watshiya uNcube ethe daca phansi. Kubikwa ngosuku olulandelayo ngehola lesikhombisa ekuseni kwathutsha enye indoda eyayisedlula yambona esebuhlungwini yamgijimisela esibhedlela seMberengwa District Hospital lapho abuye wadluliselwa eUnited Bulawayo Hospitals koBulawayo.
uInspector Emanuel Mahoko
Kubikwa uNcube watshela leyondoda eyamsizayo ukuthi ugwazwe yindoda angayaziyo eyathi imthengele utshwala wala. Kusenjalo kulendoda yeMkoba 6 Business Centre eGweru esinde ngesikhala senalithi ngemva kokuhlaselwa ngamadoda ayisikhombisa ehlome ngamabhemba ngeviki ephelileyo.
Kubikwa uObert Ndlovu oleminyaka engu-27 yokuzalwa, weShurugwi, ongumakorokoza usinde ngokulambisa kulandela ukuhlaselwa ngamadoda la kubangwa ukungazwanani enkulumeni bekwenye iNight Club eMkoba 6, okubangele ukuthi asale elamanxeba agcwele umzimba wonke.
Ekhuluma lentatheli kaMthunywa uInspector Emmanuel Mahoko uthe amadoda la esexabene loObert Ndlovu wathi esesuka ebhawa balandela bafika bamhlasela emnyameni ngamabhemba.
“U-Ndlovu ulalisiwe esibhedlela seGweru Provincial Hospital.
“Amapholisa adinga labo abangabe belolwazi ngamadoda ahlasela umamangala. Sicela labo abaziyo ukuthi bangaphi bazise amapholisa aseduzane labo,” kuphetha uInsp Mahoko.
