Uncategorized

Ugwazwa afe kumbango wentombi

09 May, 2024 - 00:05 0 Views
Ugwazwa afe  kumbango  wentombi Ulnspector Emmanuel Mahoko

uMthunywa

Langelihle Moyo

KULENDODA yeShurugwi egwazwe yafa kuviki ephelileyo endaweni yamabhizimusi eBonsor eShurugwi, kubangwa intombi.

Kubikwa uElijah Govere oleminyaka yokuzalwa engu-20 waxabana loMthabisi okungasatholakalanga isibongo sakhe bebanga intombi, esitolo sakoChakwa khona eShurugwi. Kubikwa ababili laba bacina sebetshintshela ezandleni okuyilapho uGovere akhipha ingqamu esikhwameni wagwaza uMthabisi kane wafa.

Isikhulumi samapholisa eNkabazwe uInspector Emmanuel Mahoko uthe udaba lolu lwenzakala eShurugwi njalo umetheswacala usezandleni zamapholisa.

“Kukhanya ababili laba bathi besesitolo sakoChakwa baba lokungazwisisani ngemva kokuba sebenanzelele ukuthi bathandana lentombi eyodwa.

“UGovere wakhipha umhedla esikhwameni sebhulugwe watsho ewuthela emlenzeni kaMthabisi kane okwenza wawela phansi.

“UMthabisi wagijinyiselwa esibhedlela seShurugwi District Hospital lapho afika wedlula khona emhlabeni. Umetheswacala usezandleni zamapholisa,” kutsho uInsp Mahoko.

“Njengamapholisa sixwayisa uzulu ukuthi angasebenzisi udlame ekuxazululeni ingxabano kumbe njalo adinge abantu abadala loba abakhokheli bezigaba babancedise ekuxazululeni inkinga abalazo,” kuphetha uInsp Mahoko.

 

 

Share This:

Sponsored Links

Survey


We value your opinion! Take a moment to complete our survey

This will close in 20 seconds