Uncategorized

Ugwazwa afe ephethe ihloka

15 Oct, 2020 - 00:10 0 Views
Ugwazwa afe ephethe ihloka

uMthunywa

Thokozile Mbedzi
ZILOKHU zibabaza izakhamizi zesigabeni seNtunungwe ePlumtree ngemva kokuba enye indoda igwazwe yafa iphethe ihloka ngoLwesihlanu kuviki ephelileyo.

Umuyi uNdumiso Khumalo obeleminyaka yokuzalwa engu-25 ugwazwe wafa ngemva kokuxabana loRonald Ngwenya oleminyaka engu-43 etshwaleni.

Ekhuluma lentatheli kaMthunywa uMnumzana Mayibongwe Moyo uveze ukuthi lokhe elesithuli ngendlela umuyi uNdumiso afa lula ngayo kukanti wayehamba eqala abantu ephethe ihloka.

“Kangila mathe ngendlela uNdumiso afa angayo. Ngendlela ayehamba eqala abanye njalo ethwele ihloka kwakungathi ulamandla. Waqala waxabana labangane bakhe ayenatha labo wasuka esitolo ayenathela kuso waya kwesinye lapho afika khona waxabana njalo lo Ronald yena ohle wacunuka wakhupha ingqamu wamgwaza esifubeni wahle wathi votshololo lehloka lakhe phansi.

“Mina labanye ebengimi labo sakuthatha lula sisithi uzavuka kanti sokuzahle kube yikufa kwakhe. Lokhu kusiqede inkani qiniso ngoba besisithi umhlawumbe yikudlala kanti besokuyikufa kwakhe,” kulandisa uMnu Moyo.

Kubikwa uNgwenya ebona ukuthi uNdumiso kasanyikinyeki wahle wadliwa ngumswenya.

Udaba lolu lwabikwa emapholisa.

Isikhulumi samapholisa esabelweni seMatabeleland South uChief lnspector Philisani Ndebele ebuzwa ngodaba lolu uxwayise uzulu ukuthi atshiyane lomkhuba wokuhamba ephethe izikhali.

“Sithanda ukuxwayisa uzulu ukuthi angahambi ephethe izikhali ngoba ziyingozi. Sifisa njalo ukuxwayisa uzulu ukuba nxa kulokungazwani kudingwe abadala loba amapholisa kuxazululwe indaba.”

Share This:

Sponsored Links