uMthunywa
YiNtatheli kaMthunywa
NGENXA yothando lwemali kulelinye inina lelokitshini leLobengula West koBulawayo eligwaze indoda ebelithandana layo yafa kubangwa imali.
UMxolisi Sibanda kubikwa ugwazwe ngu-Agrenna Chimali entanyeni ngoLwesibili kuyonale iviki wafa kubangwa imali.
UMthunywa uzibonele ngawakhe amehlo izakhamizi zelokitshini leli ngoLwesithathu ekuseni ziqhuba uChimali zimusa emapholiseni.
“Uyazi sonke silapha kasilankani, kambe umama lo ubulele umuntu embulalela imali yakhe. Isimanga yikuthi ubefuna imali kodwa bebengahlali bonke.
“Kukhanya umama lo ufike endlini kamuyi izolo ebusuku ezodinga imali asazi ukuthi ngeyani. USibanda uvele wamfica esesendlini kodwa kukhanya babe lokungazwisisani ekukhulumeni okubangele ukuthi uChimali adobhe ingqamu wamgwaza entanyeni wedlula emhlabeni.
“Njengoba ubona simphelekezela enkambeni yamapholisa ukuthi ayokutsho ukuthi ubulele umuntu,” kutsho esinye isakhamuzi esithande ukwaziwa ngokuthi nguMaDube nje kuphela.
Esinye njalo isakhamuzi esikhulume loMthunywa ebesiyingxenye yexuku ebeliqhuba uChimali sithe isenzo senina leli siyesabeka.
“Umama lo ulesibindi esesabekayo, kambe usuke lapho ahlala khona weza lapha wabulala umuntu embulalela imali yakhe. Asazi ukuthi imali le ibingeyesikwelede kumbe hatshi kodwa abanye bathi engabe engomunye wabathengisa umzimba,” kuchaza inina leli elingathandanga ukuqanjwa ibizo.
uInspector Abednico Ncube
Intatheli ixhumane lesikhulumi samapholisa koBulawayo uInspector Abednico Ncube oqinisekise ngesehlakalo lesi.
“Samukele umbiko wenina elibulele owesilisa ebelithandana laye.
“Kukhanya inina leli lafika endlini lakhulumisana lesithandwa salo ngemali kodwa bangazwanani laselidobha ingqamu lagwaza uSibanda andubana adinge amakhiye ukuthi avule umnyango abaleke kodwa wawaswela wasephuma ngefasitela.
“Lamuhla ekuseni inina leli liphinde labuyela endlini lafica isithandwa salo sesedlule emhlabeni laselisiya emapholiseni ukuyazimangalela,” kutsho uInsp Ncube.
“Sikhuthaza uzulu ukuba balungise indaba zabo kuhle ngokukhulumisana hatshi ngobudlwangudlwangu ngoba kucina kulahleka impilo,” kuphetha uInsp Ncube.
